https://static.elcorreo.com/www/menu/img/zurekin-desktop.jpg

Txapel Reggae jaialdia, euskal reggaeren abiapuntu

Txapel Reggae jaialdia oso ospetsu bilakatu da nazioarte mailan./
Txapel Reggae jaialdia oso ospetsu bilakatu da nazioarte mailan.

Aurtengo edizioa uztailaren 13an ospatuko da

UNAI SARRIUGARTE

Txapel Reggae jaialdia 1990. urtean jaio zen. Uda hartako Karmengo jaiek abiarazi zuten Bizkaiko kostaldeko kultur proiekturik garrantzitsuenetariko baten hasiera. Festibalaren lehenengo edizioan Potato, Kannabis eta Yassa musika taldeak igo ziren oholtza gainera.

Harrezkero 25 urte baino gehiago igaro dira. Beharbada momentu hartan inork ez luke imajinatu ere egingo Txapel Reggaea noraino iritsiko litzatekeen. Kontuak kontu egun Armintzako portuan ospatzen den festibala nazioartean oso ospetsu bilakatu da.

Jaialdia urtero antolatzen dihardute hainbat elkarte eta erakunde lokalek zein nazioarteko zenbait marka komertzialek. Izan ere, benetan bitxia eta ikaragarria da Lemoizko auzo honetako biztanleek jaialdiaren antolaketaren inguruan eskaintzen duten konpromiso eta eskuzabaltasuna.

Gauzak horrela, Txapel Reggae nazioarte mailan oso ospetsu bilakatu da, hainbat berezitasun aurkezten baititu: batetik, jaialdi ireki, anitz eta doakoa da; bestetik, Armintzako portua, festibala ospatzen den tokia, paraje ezin hobea da.

Zehazki, jaialdia Lemoizko arrantza-auzo txiki batean ospatzen da, Armintzan. Xarma handiko toki honek arrantza-portu ikaragarria eta 250 metroko luzera duen hondartza ditu, harriek eta harea lodi eta ilunak osatua.

'Un Rojo' musika banda

Jaialdiaren 23. edizioa izango da aurtengoa eta uztailaren 13an ospatuko da. Parte hartuko duten taldeen izenak oraindik igarri gabe daude, 'Un Rojo' reggae musika bandaren parte-hartzea salbu.

Orain arte, hainbat izan dira Armintzatik pasa diren musika taldeak: Macka B and The Roots Ragga Band, Johnny Clarke, Mikey General, Skakeitan, Skarra Mucci, Akatz, Itziarren Semeak, Potato, Makako, Glaukoma etab.

Aurtengo edizioak hainbat erakunde publiko nahiz enpresa pribatuen babesa jaso du; batetik, babesleak: Armintzako Jai Batzordea, Lemoizko Udala, BioBizz, Lemoizko Batzokia, Begotxu jatetxea, Norai taberna, Andraka jatetxea, Txorrope taberna, Ama Terra, Kaia eta Arrantzale taberna; bestetik, laguntzaileak: Noiz, Edenika, Patxi Koop, La Salve garagardoa, Sonort, Cañamo aldizkaria, Dothereggea.com, ACR, Stereo Zona TV, Hiruka aldizkaria, Hamaika TV eta Maide in Bilbao Scoteer Club.