Pacersen denboraldi bikainak eraztun bat merezi du?

Leku gutxitan bizi da saskibaloia Indianako herrietan bezala. Pasioa da han joko hau. Eta aurtengo denboraldian, Indiana Pacers taldeak ezustean harrapatu ditu NBAko zale guztiak maila gorenean lehiatzen eta protagonismo osoa hartzen Ekialdeko konferentzian. Taldearen joko azkar eta kolektiboak zaleen begiak erakartzeaz gain, emaitza ikusgarriak ere ekarri ditu. Denboraldi erregular osoan zehar, Pacersek joko dinamiko eta erasokorra garatu du, eta horren ardatz nagusia Tyrese Haliburton izaten ari da, argi eta garbi. Bere gidaritzapean Ekialdeko finaletara heldu dira Cavs bikainak alde batera utzi ondoren.

Haliburton makal ikusi genuen urtearen lehen egunetan, baina bere izarrak distira hartu du, estatistikoki denboraldirik onena sinatuz: batez beste 21 puntu, 11 asistentzia eta 4 errebote partidako. Baina zenbakiez haratago, kantxako lidergoa eta taldearen erritmoa kontrolatzeko gaitasuna funtsezkoak izan dira. Haren ikuspegi zorrotzak eta erabaki onek gidatu dute Pacersen erasoa, eta haren inguruan hazten eta konfiantza hartzen dute gainerako jokalariek.

Rick Carlisle taldeko entrenatzaileak konfiantza osoa jarri du Haliburtonengan, eta honek erantzun bikaina eman dio. Haliburtonek bere jokoa hobetzeaz gain, taldekideen jokoa ere goraipatu du: Buddy Hield, Myles Turner eta Benedict Mathurin jokalariek ere maila bikaina erakutsi dute bere ondoan.

NBAko titulua lau talderen artean jokatuko da: Knicks eta Pacers taldeek Ekialdeko finala jokatuko dute, eta Thunder eta Timberwolves taldeek Mendebaldekoa. Aurreikuspen guztiak hautsita, talde gazteek protagonismoa hartu dute. Ez dago faborito argirik eta lehia estua izango da NBAko koroa nork eramango duen jakiteko.

• Temas
• Harmailatik (Sergio Eguia)