Bertso saio gehiago antolatuko dituzte datorren urtean, aurtengo beherakadari aurre egiteko

Oraindik urtea ez da amaitu baina datuak dagoeneko oso argigarriak dira. Koronabirusa dela eta, aurtengo bertso saioen kopurua aurreko urtekoa baino % 60 txikiagoa izan da. Horri aurre egiteko, datorren urtetik aurrera bertsio saio gehiago antolatzea erabaki du Bertsozale Elkarteak. Horrela, hasteko, hiru bertso saio antolatu ditu lehen hiru hiletan.

Helburua lan handiagoa egitea da aurten gertatutako bertsio saioen kopuruaren jaitsiera orekatzeko nolabait. Gehien jaitsi diren bertso saioak mahai baten inguruan egindakoak izan dira, izan ere, ezarritako osasun eta higiene baldintza berrien ondorioz, horrelako bertso saio asko bertan behera geratu dira. Horien aldean, oholtzan eta ikus-entzuleen aurrean egindako bertsolaritza saioak gutxi gorabehera mantendu egin dira.

Datorren urteko bertso saioei dagokienez, lehenengoa urtarrilean bertan izango da, 30ean hain zuzen, Hazparneko Mendeala aretoan. Saio horretan, Amets Arzallus, Elixabet Etxandi, Maialen Akizu eta Sustrai Colina bertsolariak arituko dira aurrez aurre.

Bigarren bertso saioa otsailaren 13an izango da, Iruñeko Gayarren aretoan. Kasu horretan, Julio Soto, Miren Amuriza, Onintza Enbeita eta Xabier Silveira bertsolariak izango dira. Azkenik, hirugarren bertso saioa, martxoaren 27an izango da, Getariako Cristobal Balenciaga museoan. Saio horretan, Alaia Martin, Unai Iturriaga eta Uxue Alberdi bertsolariek parte hartuko dute. Saioak aretoetan zuzenean zein Internet bidez ikusteko aukera izango da. Lehen kasuan, sarrerak 12 euro balio du, eta bigarrenean, berriz, 5 euro.