https://static.elcorreo.com/www/menu/img/zurekin-desktop.jpg

Eduard Punset kataluniar zientzialaria zendu zen atzo

Eduard Punset kataluniar zientzialaria zendu zen atzo

90. hamarkadan TVEko 'Redes' zientzia programaren zuzendari izan zen

UNAI SARRIUGARTE

Eduard Punset ekonomialari, abokatu, politikari eta zientzialari kataluniarra hil egin zen Bartzelonan atzo, martxoak 22, 82 urte zituelarik. Bere familiak Twitter sare sozialaren bitartez helarazitako mezuak honelaxe zioen: «Gaur, maiatzak 22, Eduar Punset hil da Bartzelonan, gaixotasun luze baten ondoren. Bere familiak, askorentzat hain tristeak diren momentu hauetan, Redes zientzia dibulgaziorako bere programako taldeak bildutako irudiak partekatu nahi ditu, bere oroimenean».

Eduard Punset 1936an jaio zen Bartzelonan. Ikasketei dagokienez, Zuzenbidea ikasi zuen Madrilgo Complutense Unibertsitatean eta Zientzia Ekonomikoak, ondoren, Londresen eta Parisen. Era berean, kazetari ekonomiko gisa jardun zuen BBC eta The Economist komunikabideetan.

Espainiako Trantsizio Demokratikoaren garaian, Centristes de Catalunya-UCD alderdiko diputatu izan zen Kataluniako Parlamenturako lehen hauteskundeetan, 1980an. Horrez gain, ministro izan zen 1980an eta 1981ean, eta CDSko eurodiputatua, zazpi urtez. Gainera, Kataluniako Generalitateko Ekonomia eta Finantza kontseilari izan zen.

Bestalde, 1996. urtetik 2013. urtera bitartean TVEko 'Redes' zientzia dibulgaziorako programaren zuzendari izan zen. Bertan, soziologia, medikunza, psikologia, biologia edota astronomiarekin erlazionatutako gaiak jorratzen zituen.

Bestalde, BBC komunikabidearen erredaktore ekonomikoa, The Economist astekariaren Hego Amerikako edizioaren zuzendari ekonomikoa edota FMIko ekonomistaren lana burutu zuen Estatu Batuetan eta Haitin.

Halaber, COTECen aholkulari, nazioarteko marketin irakasle ESADEn, Bull Institutu Teknologikoaren presidente, Enheren zuzendari eta Kataluniako Gizartearen Informazio Plan Estrategikoaren koordinatzaile izandakoa da.

Punsetek bere bizitzan hainbat sari jaso izan zituen. Lehendabiziko saria 1981. urtean jaso zuen, 'Gran cruz de la Orden de Carlos'. Illes Balearseko Unibertsitateak Doctor Honoris Causa izendatu zuen 2010. urtean. 2011an, berriz, Kataluniako Generalitatak Sant Jordi gurutzea eman zion. Gainera, Alcalá hiriko Arte eta Letren garaikurra eman zioten 2012. urtean, komunikatzaile, idazle eta dibulgatzaile zientifiko gisa egindako lanarengatik.