Sarasola musikari eta idazleak Larrabetzun egingo du egonaldia bere lana mamitzeko
Udalbiltzak bultzatu du Geuretik Sortuak ekimena, eta bere helburua da euskara hutsean sortutako literatura, antzerkigintza eta zinemagintza sustatzea. Aurten lesakarrak izango du aukera bere proiektua burutzeko
Zurekin
Igandea, 30 uztaila 2023, 09:38
Udalbiltza euskal udalerrien partzuergoak bultzatu du Geuretik Sortuak ekimena, eta bere helburua da euskara hutsean sortutako literatura, antzerkigintza eta zinemagintza sustatzea. Horretarako, sortzaileek denboraldi bat pasatzen dute ekimenarekin bat egindako herrietako batean, eta aurten Gaizka Sarasola Lesakako musikariari eta idazleari egokitu zaio Larrabetzun egonaldia egitea bere lana mamitzeko. Sarasolak antzerki-testuak idatzi ohi ditu, baina oraingo honetan narrazioan saiatuko da. Buruan baditu istorioaren nondik norakoak.
Iazko urrian beka deialdia zabaldu zen unean iragarri bezala, aurten Udalbiltzak laugarren arte alor bat gehitzea erabaki du: literatura, zinegintza eta antzerkigintzako sortzaileez gain, komikigileak ere protagonista izango dira oraingoan. Beka deialdian 60 proposamen jaso ziren orotara lau arte alorretatik, proiektuko arduradun politikoa den Koro Etxeberriak adierazi bezala, «askotarikoak eta kalitate altukoak».
Lehen edizioan bezala, bigarren hau ere bi urtez luzatuko da. 2023an zehar sormen egonaldiak egingo dira 22 multzotan bildutako 39 udalerritan. Aurten ere bi, hiru, lau edota bost udalerritako multzoak egongo dira, euren kabuz parte hartzea erabaki duten udalerri horiez gain. Bakoitzera, Udalbiltzak eta arte alor ezberdinetako adituek osatutako balioespen batzorde batek hautatutako sortzaileetatik bat joango da; jasotako proiektua garatu ahal izateko epaimahai honek egokien ikusi duen udalerri edota udalerri-multzora, hain zuzen. Udalerri horretan edo horietan hiru astera bitarteko egonaldiak egingo dituzte sortzaileek; eta bertatik ipuin luzeak, 15-20 orrialde bitarteko komiki lanak, 10-20 minutu arteko film laburrak eta antzezlanak aterako dira.
Ziklo berri honen bigarren urtean, 2024an, sortutako lan guztiekin kultur zirkuitu bat osatuko da. Ipuinak eta komikiak bilduma banatan argitaratuko dira; film laburrekin muntaia orokor bat egingo da, eta antzezlanak euren kabuz aurkeztuko dira herri horietan. Zirkuitu hau egonaldiak jaso dituzten udalerri guztietatik igaroko da.
