Jokic, zerura igo segidan erortzeko

NBAk ez du inoiz Nikola Jokic errespetatu. Ligako pibotik erabakigarriena da (Anthony Davisen baimenarekin). Embiid baino askoz osoagoa da, kamerundarra beste maila lehiakor batean dagoen arren. Jenio bat da. Zerbaitegatik deitzen diote Joker. Bere abizenarekin erraza delako, bai, baina baita edozein egoeratan komodina delako ere. Saskiratzerakoan asko eta ondo egiten du beti. Erreboteak hartzeko erraztasun iraingarria du. Eta, aurreko guztiaren gainetik, pasatzaile superlatiboa da. Pinturan inork ez du saskibaloia berak bezala ikusten. Marc Gasol izan ezik eta hau ere NBAk gutxi errespetatzen duen beste bat da.

Oztopo (eta irain) guztiak gaindituz, Jokicek denboraldiko MVP saria irabazi du aurten. Botoen %85 baino gehiagorekin, Embiid (protesta egin zuena) eta Stephen Curry gaindituz. Adituek diotenez, egon daitekeen polemika bakarra Nuggetsen izarraren aldeko hautaketa adostasunez ez izatea da. Bai, aditu horiek dira ere baldarra dela ziotenak: forman ez zegoela (potoloa deitzen zioten), ez zituela partidak irabazten, bere oin-jokoak ez zirela onak...

Ezerk ezin du Nikola geldiarazi. Tipo jatorra, ume handi bat. Gerra baten erdian mundura etorri zena (zorionez, Europak jasan behar izan duen azkena) eta NBAn ospetsu egin zena egunean hiru litro Coca Cola edaten zituelako. Hori arraroa zen profesional batengan (eta edonorengan) eta egia da tripa handi bat ematen ziola.

MVPa irabazi du baina patuak oraindik uko egiten dio Somborrekoarekin atsegina izateari. NBAko historian estatubatuarra ez zen laugarren MVP bihurtu berri den aste berberan (Nash -kanadiarra-; Nowitzki eta Antetokoumpo dira beste hirurak), Phoenix Sunsek Denver play offetatik baztertu dituzte, azken partidan Jokic arbitroek kanporatuta bukatu zuelarik, aurkari bati erasotzeagatik.

Egia esan, ez zen erasorik izan, baina egindako falta gogorra horrela jasotzen du araudiak, eta, ondorioz, serbiarrak gainerako kideek baino lehenago joan behar izan zuen oporretara. «Neurketaren dinamika aldatu nahi nuen, gure defentsa piztu, nire taldeari amorru pixka bat eman, eta falta gogor hori egitea aldez aurretik pentsatu nuen. Egia da hori. Baina ez nuen inor jo nahi izan, baloira joan nintzen. Buruan eman ote diodan ere ez dakit ziur. Hala bada, barkatu, ez zen nire intentzioa, inoiz ez nintzateke saiatuko kantxan inori min egiten. Sentitzen dut», esan zuen protagonistak berak.

Malonen mutilek 0-3 kanporaketan eta zortzi puntu atzetik partidan, hil edo bizi unea zen. Hil egin ziren. Orain eguzkia inoiz baino distiratsuagoa da Sunsentzat, Steve Nash NBAko lehen MVP atzerritarraren garaitik hain goian ikusten ez zirenak. Jakina, Olajuwonek eta Duncanek ere irabazi dute saria, baina biek estatubatuarrak ziren, nahiz eta AEBn jaio ez. Lehena, Laosen jaiota, Nigeriarra beraz, txikitan joan zen Amerikara. Bigarrenak, Christiansteden jaiota, Birjina Uharteetan, herritartasuna eskatu besterik ez zuen. Birjina Uharteak Estatu Batuetako lurraldea baita.