Irainak eta mehatxuak Irakeko Parlamentuko emakume hautagaiei
951 emakume aurkeztu dira hauteskunde hauetara eta Parlamentuan eserlekuen %25a erreserbatuta dute
Hauteskunde-kanpainan hainbat mehatxu eta irain jasan dituzten arren, 951 emakume aurkeztu dira igande honetako Irakeko Parlamenturako hauteskundeetara. Ganberan eserlekuen %25a haientzat erreserbatuta daude, baina bertara heltzeko bidea ez da batere erraza izan.
Nada al Yaburi, doktore eta emakumeen eskubideen defendatzailea da eta kanpaina honetan difamazioak eta mehatxuak jasan ditu. Honako hau ez da aurkeztu den lehen aldia izan, baina aurtengo hauteskundeak «okerragoak» izan direla deritzo. «Agian nire aurkariak konturatu direlako indartsuago egin naizela», dio. Kanpaina oso arrakastatsua burutu du sare sozialetan, baina ezezagun batzuek haren fotomuntaiak argitaratu zituzten «barruko arropetan». Gertakari horiek kanpaina osoan errepikatu dira, nahiz eta aurten Irakek hautagaiak babesteko neurriak martxan jarri dituen, hautagai guztien %30 emakumeak inguru baitira.
Hautagaiek zuzenean salatu dezakete haien kontrako indarkeria polizia-etxe batetik igaro behar izan gabe eta Barne Ministerioak telefono bat ezarri du kexetarako, baina nahikoa ez dela dio Hanaa Edwarrek, Amal elkartearen eta Iraki Emakumeen Sarearen sortzaileak. Sadam Husein diktadorearen erorketaren ondoren, Edwarren ekarpena funtsezkoa izan zen Legebiltzarrean emakumeen %25eko gutxieneko kuota ezartzeko, baina oraindik ere bere papera eta pisua mugatua da politikan. «Guretzat, emakumeentzat, ospe txarrak eragin suntsitzailea izaten jarraitzen du», dio beste hautagai batek.
Hala eta guztiz ere, Edwarrek oraindik amesten du emakumeek Irakeko gizartean beren lekua lortzea, eta bere itxaropenak belaunaldi berriengan jartzen ditu. «Oso harro nago manifestazioetan parte hartu duten emakume eta gizon gazteez», dio.
