Gaiztoen artean gaiztoenak agur esan dio saskibaloiari betiko
Harmailatik ·
Bill Laimbeerrek NBAko bi eraztun irabazi zituen Pistons ahaztezinekin eta WNBAko beste hiru txapelketa, Detroit Shockseko entrenatzaile gisa
Garai batean, Pistonsen saskira gerturatzeak Sherwoodeko basoa zeharkatzeak baino arrisku handiagoa zuen. Bill Laimbeer eta Rick Mahorn ziren orduan kantxaren jabeak. Haiengana hurbiltzea arazoen sinonimoa zen. Baloia ia seguru galduko zenuke. Oreka, zalantzarik gabe. Eta beharbada konortea ere, egun horretan Bad Boys taldeko gaiztoenek egurra emateko gogoa baldin bazuten...
Alabaina, denborak erakutsi digu Laimbeer ez zela hain tipo txarra (nahiko jatorra zen zapatilak kentzen zituenenan) baita saskibaloian uste genuen baino askoz hobeto jokatzen zuela ere. Hala, kirol honetako pertsonarik sarituenetako bat bezala erretiratu da duela aste batzuk.
Bostonen jaioa, Detroiten egin zuen karrera. Lehenengo urteetan gutxi eta nahiko txarto jolastu zuen. Gero bere lekua aurkitu eta Mahornekin batera bikote beldurgarri bihurtu ziren.
Pistonsekin bi eraztun irabazi zituen, eta, garai hartan, bere saskibaloirik onena erakutsi ere. Denboraldi batzuk bete zituen 16 puntu eta 12 errebote baino gehiagorekin, batez beste. Izar baten estatistikak, zalantzarik gabe. Hala ere, ez dugu geure burua orain engainatuko: Laimbeer zikina zen benetan. Horrela, saskibaloia ulertzeko modu baten adierazle nagusia zen: dena baimentzen den joko fisikoaren adierazle gorena, alegia.
Jordanen zenbakietan
Baina askoz gehiago zen. Bere ibilbidean, batez beste, hiruko marratik %30etik gorako portzentajean asmatu zuen, Michael Jordanen eraginkortasun bera erakutsiz. Laimbeerrek 2,10 metro baino gehiago neurtzen ditu. Laurogeiko hamarkadaren amaieran, zelaian hain zatarra izan ez balitz, jokoa aldatuko zuen unicornioa bezala aipatuko genuen. Agian gu konturatu gabe aldatu zuen, egun pibot guztiek jaurtitzen baitute hiruko marratik.
Gainera, Billek asko daki jokoaz maila teknikoan, izan ere, jokalari eta entrenatzaile gisa asko irabazi zuen. Eta baliteke bigarren eginbeharrak ere meritu handiagoa edukitzea. Pistonsek Isaiah Thomasen bikaintasuna zuten, Joe Dumarsen kalitatea eta Denis Rodmanen 'ez dakit zer' hori. Shocketan, aldiz, Detroiteko emakumezkoen taldean, historia egin zuen ezustean beste hiru eraztun irabazita. 2003ra arte, Laimbeerrek Shocksen aulkian egin zuen bigarren ikasturtera arte, Sparks edo Comets taldeetatik aparte inork ezin izan zuen liga irabazi.
Esandakoa, azkenean, Laimbeer gaiztoen artean hain txarra izanez gero, oso ona izan zen.
