https://static.elcorreo.com/www/menu/img/zurekin-desktop.jpg

Erika Elizarik irabazi du 21. Igartza Saria

Erika Elizari. /Beasaingo Udala
Erika Elizari. / Beasaingo Udala

'Zendabalitz' izenekoa hautatzea erabaki du Miren Amurizak -iazko edizioko garailea-, Garazi Kamiok eta Igor Estankonak osaturiko epaimahaiak

AMALIA IBARGUTXI

Aurpegi berria da Erika Elizarirena (Hernani, Gipuzkoa, 1988) literatur munduan, eta bere lana izan da epaimahaiak hautatu duena Igartza sariaren XXI. edizioko garaile. Aurkezturiko hamabi proiektuen artean, 'Zendabalitz' izenekoa hautatzea erabaki du Miren Amurizak -iazko edizioko garailea-, Garazi Kamiok eta Igor Estankonak osaturiko epaimahaiak. Idazle gazteei bere proiektua garatzeko ematen den beka honi esker, Elkar argitaletxeak publikatuko du gero Elizariren eleberria.

Ikus-entzunezko ikerketak burututakoa da hernaniarra, eta bere ibilbide profesionala ere, batez ere arlo horretan egin du. Telebistan egin du lan erredaktore gisa azken urteotan, eta adierazi duenez, sormena ikus-entzunezko euskarriaren bitartez garatu izan du batik bat: «Film laburrak eginez, dokumentalgintzan… Beti izan dut sen sortzaile bat eta sortzeko behar bat. Baina, batez ere, bideogintzaren bitartez ase dut. Bestela, idatzi izan dudana oso era intimoan egin dut eta gehiegi partekatu gabe».

Bere esanetan, ugariak izan dira aurten lehiaketako bultzada eman dioten arrazoiak. Igartza sariaren jarraipena egindakoa da azken urteetan, eta saria jasotako lanak irakurtzeko ohitura hartua zeukan. Bestalde, 30 urte bete berri dituela eta beka eskuratzeko gehienezko adinetik gero eta gertuago zegoela ikusita, haurdunaldian izandako idazteko denbora baliatuta idatziko du 'Zendabalitz'.

Hegaldi gorabeheratsu baten kronika biltzen duen eleberria izango da,bidaiarien barne-bakarrizketez osatutakoa. «Hegazkina aireratze pistatik metro eskasera pausatu da arazo tekniko txiki bat antzeman dutelako. Ezusteko horrek zazpi bidaiarirengan kontzientzia turbulentziak sortuko ditu eta euren iraganari edota etorkizunari lotutako ardurak iratzarriko dizkie», esan du.

Zazpi bidaiari horien ikuspegietatik egingo da bidaiaren kronika, eta kapitulu bakoitza pertsonaia bati egokituko zaio. Nobelak ez du, hala ere, egoeraren alde dramatikoenean sakonduko. Idazlearen asmoa da irakurleak ondo pasatzea irakurri bitartean.

Contenido Patrocinado

Fotos

Vídeos