https://static.elcorreo.com/www/menu/img/zurekin-desktop.jpg

Bermeoko Udalak Gaztelugatxen bisitaldiak burutuko ditu Aste Santuko egunetan

Bisitariak, Gaztelugatxen./Maika Salguero
Bisitariak, Gaztelugatxen. / Maika Salguero

Gaztelugatxe bisitatzeko aukera izateaz gainera, Aste Santuko prozesioez, itsas ibilbideez, arrantzaleen museoaz eta beste zenbait jardueraz gozatu ahal izango dute interesdunek

UNAI SARRIUGARTE

Bermeoko Udalak eskaintza turistiko zabala eskainiko du Aste Santuko egunetan. Gaztelugatxe bisitatzeko aukera izateaz gainera, Aste Santuko prozesioez, itsas ibilbideez, arrantzaleen museoaz eta beste zenbait jardueraz gozatu ahal izango da.

Gaztelugatxeko bisitaldi gidatuak apirilaren 28ra art alokatu ahal izango dira. Ikustaldi hauek doakoak dira eta euskaraz (12:00, 14:00 eta 16:00) eta gaztelaniaz (13:00, 15:00 eta 17:00) eskainiko dira. Izan ere, ermitaren ordutegia 11:00etatik 18:00etara izango da.

Gaur egun, Gaztelugatxe Euskal Herriko santutegirik ospetsuenetarikoa da. Urtero milaka pertsona iristen dira uhartetxo txiki baten gainean egindako ermitara. Ermita hau gotorleku izan da hainbat gudutan, Gaztelako koroaren aurka erresistentzian edota kortsarioen erasoen aurrean. Era berean, Erdi Arotik erlijio ohituren eta sinesmenen erreferente ere bada.

Gaztelugatxeko erlijio errituak itsasoari lotutakoak dira eta ermita barruan hainbat eskaintza daude zintzilik: itsasontzien maketak, pinturak, argazkiak... Hauek, marinelek eta arrantzaleek ontzia itsasoko arriskuetatik babestearren santuari eskerrak emateko egin ohi dituzten eskaintzak dira.

Pasa den urtetik bisitari kopurua kontrolatzeko eta jende masifikazioa ekiditeko asmoz ezinbestekoa da erreserba egitea. Tiketak doakoak dira eta hemen dira eskuragarri.

Gainera, laugarren urtez Bermeotik eta Bakiotik Gaztelugatxera joateko autobusa egongo da. Autobus linea Bermeotik Bakiora doan A3524 linea da. Bermeotik 10:00tik 20:00ra bitartean irtengo da, eta, Bakiotik, berriz, 09:30tik 19:30era bitartean. Autobusa bi norabideetan orduero hartzeko aukera egongo da.

Bestalde, Bermeoko Udalak zenbait jarduera turistiko burutuko ditu Aste Santuko egunetan: batetik, Santa Eufemia, Santa Maria eta San Frantzisko elizak bisitatzeko abagunea egongo da. Bestetik, Arrantzaleen Museoan 'Arrainak Bermeon: izena hartu eta eman' izeneko erakusketa izango da apirilaren 23tik 26ra bitartean.

Gainera, Tribisburuko nekropoli erromatarra ezagutzeko eta Aste Santuko prozesioak (apirilak 19, ostirala, 11:00 eta 18:00) ikusteko parada egongo da. Prozesioei dagokienez, Bermeon Bizkaiko kostaldean egiten diren bakarrak dira eta historia handiko prozesioak dira, euskal kostaldeko zaharrenetarikoak.

Aste Santuko egunetan burutuko diren jarduera turistikoak Bermeoko turismo web gunean (www.bizibermeo.eus) kontsultatu ahal izango dira. Bertan, ordutegiak, lekuak, prezioak eta harremanetarako kontaktuak jakinaraziko dira. Era berean, Bermeoko turismo bulegoan (94 617 9154) informazioa jaso ahal izango dute herritarrek eta bisitariek.