'Yoko oporretan', ikusgai zineman
3 eta 7 urte bitarteko haurrei zuzenduta dago eta telesaileko pertsonaia berberak dira
leire larrazabal
Astelehena, 28 azaroa 2022, 15:39
'Yoko oporretan' filma ostiral honetan, abenduaren 2an, estreinatu da zinema aretoetan. Juanjo Elordi zuzendariak eta Edorta Barruetabeña idazlearen eskutik, Dibulitoon eta Wizart Animación etxeek ekoitzi dute filma, ETBren, Gipuzkoako Aldundiaren eta Eusko Jaurlaritzaren laguntzarekin. Filmak 61 minutuko iraupena du, 3 eta 7 urte bitarteko haurrei zuzenduta dago, eta adin horietako umeek zineman duten lehenengo esperientzia gisa sortuta dago, aldez aurretik dagoeneko ezagutzen duten telesail batean oinarrituta baitago. 79 atal ditu telesailak, eta 20 herrialde baino gehiagotan ikus daiteke.
Horrela, telesaileko berberak dira filmeko pertsonaiak: Yoko, pertsonaia iragarrezina, gainerakoak harritzen eta babesten saiatzen dena, eta Oto, Mai eta Vik umeak, hiru nortasun oso ezberdin baina osagarri irudikatzen dituzten pertsonaiak eta, azkenean, beti elkar ondo ulertzen dutenak. Filmean beste hiru pertsonaia ere agertzen dira: Moko, Toko eta Izoko, Yoko bezala jenioak direnak, munduko beste parke batzuetakoak, eta haurrekin jolastuko direnak, haien irudimena piztuz.
Euskaraldiak eta Eusko Jaurlaritzako Hizkuntza Politika Sailak filma babesten dute. Horrela, Miren Dobaran Eusko Jaurlaritzako Hizkuntza Politikako sailburuordeak eta Kike Amonarriz Euskaltzaleen Topaguneko presidenteak aurkezpen ekitaldi batean nabarmendu zutenez, «oso garrantzitsua» da haurrei zuzendutako euskarazko kalitatezko edukiak sortzea. Gainera, azpimarratu zuten «garrantzi handia» duela gurasoak seme-alabekin batera zinema euskaraz ikustera joateak, hizkuntza menderatzen ez badute ere.
