Sugar Daddy and The Cereal Killers taldearen kontzertua izango da larunbatean Gasteizen

Sugar Daddy & The Cereal Killers taldearen kontzertua izango da datorren urriaren 19an Gasteizko Hell Dorado Kultur Elkartean. Kontzertua 22:30ean hasiko da, baina aretoko ateak 21:30etik irekita egongo dira. Milango taldearen kontzertua ikusteko sarrerak ohiko lekuetan eros daitezke, hots, online (17,5 euro) eta leihatilan (19 euro). Bazkideentzat 14 eurotan salduko dira sarrerak.

Taldea 2009. urtean sortu zen Milanen. Urte horretan, Simone Caputo (Sugar Daddy gisa ezaguna dena), bere proiektu pertsonala sortzen hasi zen Francis Needham bateria-jotzailearekin eta Roberto Boldi baxu-jotzailearekin batera. Aurreko proiektuetan bezala, bluesa nagusi jotzen zuten, eta haize-instrumentuak ere gehitu zituzten, besteak beste Luigi Napolitano, Roberto Dibitonto eta Cosimo Pignataro. Geroago, John Bramley piano-jotzailea sartu zen taldean.

Gaur egun Rhythm & Blues ere darabilte kontzertuetan, baina swinga eta boogie woogie alde batera utzi gabe. Egiten duten musika 40ko hamarkadako Ipar Amerikako musika da, eta beti doaz dotore jantzita.

Bere kantak sortu dituzte, 'Thirteen Days' izeneko LPn jasotakoak, baina klasiko handien bertsioak ere jotzen dituzte, hala nola Muddy Waters, Little Richard, Ray Charles edo Luis Prima. Bestalde, Europa osoko agertokietatik ibili dira beste talde batzuekin, besteak beste Ray Collins Hot Club, Polecats edo The Limboos. Ematen dituen kontzertuak oso biziak dira, baita dinamikoak eta elektrikoak ere, eta Europan zale finkoak izatea lortu du, hain zuzen ere bere estilo nabarmen eta indartsuari esker.