Miamik Herro onena behar du txapeldun izateko
Harmailatik ·
Tyler Herrok urteko ordezko onenaren saria irabazi du. 100 bototik 93 Heatarren eskolta gaztearentzat izan ziren
Denboraldi erregularra maitasuna eskatuz hasi zuen, eta ordezko jokalaririk onena bezala amaitu du. «Nire jokoaren mailagatik, uste dut NBAko izar berriei buruzko elkarrizketa horietan egon beharko nukeela», esan zuen lehiaketa hasi baino lehen. «Luka Doncic, Ja Morant edo Trae Youngen mailan nagoela uste dut».
Argi dago ezetz. Ez, Tyler, ez. Ez zaude Doncic edo Moranten mailan. Ezta Youngekoan ere. Beraien taldeen jokoaren pisu guztia kargatzen dute horiek. Haiek kirol honetako superizarrak dira eta zu taldeko jokalaria besterik ez. Bikain eta aparta, bai, baina taldekide bat besterik ez.
Hori bai, Miamik txapelketa irabazten badu, zu izango zara gakoa. Zuk bai irabazi dezakezula NBAko eraztun bat aurten. Beste hiru horiek ez dut uste. Eta gainera Heatarrek ezin dute zu gabe hau egin.
Young kanporatuta dago jada. Atlanta ez dago play off baten mailan une honetan. Doncicek (Dallas) eta Morantek (Grizzlies) miraria egin eta eraztuna lor lezakete. Logikoena, dena den, Sunsek (faborito nagusiak) eta Warriorsek haien aurka jokatzen ari diren kanporaketetan aurrera egitea da.
Orduan Herrok berriro aldarrikatu beharko luke bere figura. Denboraldi honetan seigarren gizonezko onena izendatu dute, NBAk sari hau emateko galdetzen dituen 100 kazetari espezializatuetatik 93k bere izena emanez.
Eskolta estatubatuarraren hirugarren denboraldia da NBAn, eta batez beste 20.7 puntu, bost errebote eta lau asistentzia lortu zituen 66 partidatan, horietatik 56 ordezko gisa hasita. Bere puntuen batez bestekoa NBAko altuena da ordezkoen artean, eta Estatu Batuetako ligako historian 20 puntutik gorako batez bestekoa izan duen bosgarren jokalaria da, Thurl Bailey (1987-88), Eddie Johnson (1988-89), Ricky Pierce (1989-90, 1990-91) eta Lou Williamsekin (2017-18, 2018-19) batera.
Denboraldi bikainean, Heat taldea lehen postuan izan zen Ekialdeko Konferentzian, Herrok hogeita hamar puntu baino gehiago lortu zituen zortzi partidatan eta gutxienez 25 puntu sartu zituen hogei alditan.
Duela bi denboraldi, bere lehen urtean, Herrok munduaren arreta erakarri zuen Orlandoko burbuilaren play offean egindako lan bikainagatik, Floridakoak LeBrongo Lakersen aurkako finalera eraman baitzituen. Aurten, txapeldun izateko, Miamik berriz ere Tyler Herro onena behar izango du.
