Jorge Drexler eta Omara Portuondoren kontzertua, ostiralean, Mendizorrotzan

Asteburua gozatzen hasteko, Jorge Drexler musikari uruguaitarraren eta Omara Portuondo jazz abeslari kubatarraren kontzertua izango dugu ostiralean, Mendizorrotzan, Gasteizko Jazzaldiaren barruan. Kontzertua 21:00etan hasiko da eta sarrera erosi nahi izanez gero, hemen egin daiteke. Uruguaitarrak hainbat Grammy latindar eskuratu berri ditu, eta bere azken lanak arrakasta handia ere izan du. Kubatarrari dagokionez, Roberto Fonseca piano-jotzailearen laguntza izango du kontzertu honetan.

Jorge Drexler kantautorea izatez gain, aktore, konpositore eta medikua ere bada. Izan ere, musikaren munduan murgildu aurretik, mediku gisa aritu zen lanean. Montevideon Caetano Velosoren eta Joaquín Sabinaren hasierako talde gonbidatu gisa aritu ondoren, 1995. urtean Espainiara joan zen Sabinaren hiru kontzertutan jotzera, eta Madrilen bizitzen geratzea erabaki zuen.

Besteak beste Ana Belén, Mercedes Sosa, Maria Rita, Víctor Manuel, Pablo Milanés, Miguel Ríos, Ketama, Neneh Cherry, Shakira, Ana Torroja, David Broza, Rosario Flores eta Jovanottik jo dituzte haren abestiak, eta Magaly Solier-ekin batera ere abestu du.

Esan bezala, azaroko Latin Grammy sarietan hiru sari irabazi zituen, kategoria garrantzitsuenetan hain zuzen ere: abestirik onena, urteko grabaketarik onena eta kantautore bildumarik onena. Guztira, 11 lan kaleratu ditu bakarlari gisa.

Bestalde, Omara Portuondo, son eta boleroen abeslari kubatarra da. Dantzari gisa hasi zen lanean baina asteburuetan jazz abeslari moduan egiten zuen lan, Loquibambla Swing izeneko taldean. 1950. urtean Anaconda Orkestraren kidea izan zen, eta 1952. urtean Las d'Aida laukotea sortu bere ahizparekin eta Elena Burke eta Moraime Secadarekin. Kubako musikaren laukoterik garrantzitsuenetako bat bihurtu zen, eta 15 urte eman zituen han. 1959. urtean berak bakarrik egindako lehen lana kaleratu zuen.

70eko hamarkadan Orquesta Aragón orkestran ibili zen, eta zenbait herrialdetan eman zituen kontzertuak, hala nola Frantzian, Japonian, Belgikan, Finlandian eta Suedian. Drexlerek bezala Grammy bat irabazi zuen, 2009. urtean hain zuzen ere, Bilduma Tropikal Garaikiderik onenaren kategorian. Hori lortzen zuen lehen kubatarra izan zen. Hainbat disko kaleratu ditu, eta azkena, iaz kaleratu zuen, «Omara Siempre» izenekoa.