Deiadar Mendien Eguna Balmasedako Kolitzan ospatuko da urriaren 7an
Elezaharrak dioenez, Erdi Aroan seinale akustikoak egiten ziren adarrez eta beste material batzuez egindako bozinekin, Bizkaiko Batzar Nagusietako ahaldunei dei egiteko. Orain tradizioa urtero berreskuratzen da Oiz, Gorbeia, Ganekogorta, Kolitza edo Sollubeko gailurretan
Urtero bost tontor hauetako batean ospatzen da Deiadar Mendien Eguna: Oizkoan, Gorbeiakoan, Ganekogortakoan, Kolitzakoan edo Sollubekoan. Horrek iraganera bidaiatzera garamatza, Erdi Aroko mundu hartan soinuek telefonorik eta sare sozialik gabe zuten garrantzia ulertzera, alegia. Izan ere, elezaharrak dioenez, seinale akustikoak egiten ziren adarrez eta beste material batzuez egindako bozinekin, eta argi-seinaleak pizten ziren eguna ondo sartu arte, Bizkaiko Batzar Nagusietako ahaldunei deitzeko.
Bada, aurtengo edizioan jai honen 18. edizioa urriaren 7an ospatuko da Balmasedako Kolitza mendiaren tontorrean. Bizkaiko Batzar Nagusiek lurraldeko bost mendi talderekin lankidetzan antolatzen dute urtero hitzordua: Balmaseda Mendi Taldea -aurtengo talde anfitrioia-, Gailurra (Bilbo), Ganzabal (Lemoa), Sollube 707 (Bermeo) eta Alpino Tabira (Durango). Hala, esan bezala, Gernikan egiten ziren bileren deialdia iragartzeko adarraren soinua entzungo da berriro egun horretan.
Parte hartzaileak Kolitzaren tontorrera igoko dira, 12.00etan adarrak jotzeko tradizioa beteteko asmoz, Balmasedako udaletxeko plazaren eta mendi tontorrean dagoen San Roke baselizaren arteko igoerako sei kilometroak egin ondoren.
Tontorretatik lekualdatzen den adarra
Bizkaiko antzinako tradizioak gogorarazten dituen jardunaldian, egunerako berariaz egindako eta 2004tik urtez urte deiadar tontorretatik lekualdatzen den adarra erabiltzen da. Aurten, baselizearen ondoan adarren soinua entzun eta gero, antolatzaileek jaigune txiki egokituko dute tontorretik metro gutxira dagoen aterpean, musika, dantza tradizionalak eta igoera egiten dutenentzako aperitibo txiki bat eskainiz.
Jai giroan, eta tradizioak agintzen duen moduan, 2023ko igoeraz arduratuko den Balmaseda Mendi Taldeak lekukoa emango dio Bermeoko Sollube 707 klubeko ordezkariari, deiadar mendietako igoeren zikloarekin jarraituz, 2024an Sollubeko igoera antolatuko duen elkarteari, hain zuzen ere.
Deiadar Mendien Eguna martxa klasiko bihurtu da dagoeneko mendizaleen eta euskal tradizioen artean. Pandemiaren ondoriozko bi urteko etenaren ondoren, Gorbeian egin zen azken edizioa, eta eguraldi txarra izan arren, ehunka pertsona joan ziren Bizkaiko Batzar Nagusietarako deialdira. Espero dezagun, beraz, aurten meteorologiarekin zorte handiagoa izatea, eta iraganera duintasun handienarekin eramango gaituen festa bikain bat egin ahal izatea.
