Korrika 19k jada motorrak prest ditu
Aurkezpen soziala ostegun honetan egin zuten Alondegian, hainbat eragilerekin batera
iraitz vazquez
Sábado, 14 de marzo 2015, 16:22
Hemen da Korrika19. AEKk antolatzen duen euskararen aldeko lasterketak Euskal Herriko kale eta errepideak euskaltzalez beteko ditu hilaren 19an Urepelen hasi eta 29an Bilbon ekitaldi berezi batekin bukatu arte. Lekukoa eskuz esku ibiliko da egun hauetan guztietan zehar, Bilbon mezua ezkutua irakurri arte. Datorren larunbatean, hilaren 21ean, sartuko da Korrika Gipuzkoan Berastegitik eta astelehenera arte ibiliko da gure herrietan barrena 'Euskahaldun!' lemapean euskara zabalduz.
Ostegun honetan egin zen Alondegian aurkezpen soziala, bertan hainbat eragile sozial izan zirelarik. "Ilusionatuta bezain urduri gabiltza", adierazi zuen ekitaldian Asier Amondo Korrikako arduradunak. "Motorrak berotzea oso ariketa polita izan da. Orain jada azken txanpan sartu gara: Urepel txikian izanen den hasiera eguneko besta handia prest dugu, hemen ari garen bitartean jendea deika ari da, edo bertan dugu, AEKren euskaltegietan", esan zuen irribarretsu Amondok.
