Erresuma Batuak CAFen abiadura handiko trena hartu du erreferentziatzat

Robert Goodwill Erresuma Batuko Garraioetarako estatu idazkariak topaketa bat izan du aste honetan CAF euskal konpainiako ordezkariekin, 'Oaris' abiadura handiko trenaren unitatea gertutik ezagutu ahal izateko. Trena Zaragozako Delicias tren geltokian ezagutu du, eta egindako bisitan, Erresuma Batuko Garraioetarako Estatu idazkariarekin batera, Britainia Handiak Madrilen duen enbaxadore Simon Manley, Renfeko presidente Pablo Vázquez eta Adifeko presidente Gonzalo Ferre ere izan dira. Horiek guztiek, Andres Arizkorreta CAFeko kontseilari delegatuarekin batera, "unitateak jasotzen dituen aurrerapen teknologiko handiak eta diseinu modernoa egiaztatu ahal izan dituzte".

Unitateak, gainera, erabiltzailearentzako puntako prestazioak eskaintzen ditu erosotasunari eta funtzionalitateari dagokienez. Oaris unitatearekin lotuta, CAFek azpimarratu du aurten Norvegian kontratua itxi duela abiadura handiko trenaren zortzi unitate Flytoget AS enpresa publikoari hornitzeko.

Horrekin lotuta, gogorarazi du urtea amaitu aurretik Erresuma Batuak Londres eta Birmingham hiriak lotuko dituen abiadura handiko trenaren proiektuaren (HS2) lehen faseko lizitazio prozesua abiaraztea aurreikusi duela. Horren eraikuntza lanak 2017an hasiko direla aurreikusi dute eta, bigarren fasean, linea herrialdeko ipar-mendebaldera luzatuko dute (Manchester eta Leeds hiriak). Proiektuaren aurrekontua 50.000 milioi euro baino gehiagokoa izango da eta Europan hurrengo urteotarako aurreikusitako azpiegitura proiektu handienetako bat da.

Azken urteotan, CAFek presentzia handia izan du Erresuma Batuan eta ibilgailuen eta zerbitzuen gama zabala jarri du abian. 1990eko hamarkadan, enpresak unitateak hornitu zituen Northern Spirit linearako eta aireportua Londres hiriarekin lotzen duen Heathrow Express konexiorako. Gerora, NIR enpresarentzat (Ipar Irlandako trenak) proiektuak garatu ditu eta, trenak fabrikatzeaz gain, mantentze-lanak ere egin izan ditu. Bestalde, enpresa Edinburgh eta Birmingham hirietarako tranbien hornikuntzaz arduratu da.

Aurten, CAFek 200 milioi euro inguruko balioa duen kontratua sinatu du Caledonian Sleeper kotxeak hornitzeko. Londres eta Glasgow-Edinburgh arteko zerbitzua egiten du eta horien entregak 2018. urterako aurreikusi dituzte. Gaur egun, operadore ugarirentzako lehiaketatan parte hartzen ari da CAF herrialde hartan. Gainera, Londreseko metroko lehiaketarako aurrekalifikazioa lortu duen enpresetako bat da. Era berean, lehen aipatu dugun HS2 abiadura handiko linearako lizitazioarekin lotutako interes handia dago eta horrek agerian utzi du hurrengo urteotan Erresuma Batuan duen presentzia areagotzeko konpainiak duen interesa.