Artearen balioa

Zenbat balio du artelan batek? Negozia al daiteke arte-sorkuntza baten prezioa? Nola eta nork erabakitzen du zer balio ematen zaion pintore bati? Lagun pintore batekin izandako elkarrizketa baten harira egiten ditut gogoeta horiek, eta hark aitortzen dit oso nekatuta dagoela inguruko jendeak koadro bat enkargatzen diolako, baina berak finkatzen duen obraren kostuaren prezioa jaisten saiatzen da.

Ohiko edozein transakzio ekonomikotan gertatuko ez litzatekeen egoera da, eta alderantzizko enkante bat balitz bezala, artistarekiko eta haren obrarekiko errespetua zalantzan jartzen da. Beraz, gizartearen zati batek artisten lana behar bezala baloratzen ez duela erakusten du. Ustezko erosle horiek ez dituzte kontuan hartzen hainbat faktore, hala nola, materialen garestitasuna, inbertitutako denbora, talentuaren eta kontzentrazioaren xahutzea... Hau da, artelan bat erosi nahi dute, baina beraiek agindutako prezioan.

Beste jarduera batzuetan bezala, artean ere 'caché'-a artistaren ospean, bere ibilbideko mugarri eta sarietan eta bere lanak sortzen duen eskarian oinarritzen da. Baina horrek ez die gehiegi axola hitz egiten ari garen pertsonei.

Horrelako egoeren aurrean, «aizu, eta erdian uzten badidazu?» edo, «baina jeitsi iezadazu pixka bat prezioa, ezagunak baikara»; nire lagunak erabaki erradikal samarra hartu du, baina guztiz logikoa eta koherentea: nahiago du obra oparitu hurbileko jendeari, benetan baloratzen dutenei, prezioa jaisten saiatzen direnei saltzea onartu baino. Duintasuna deitzen da.

• Temas
• Euskera
• Maldan behera