Maialen Lujanbioren bertso ibilbidea, gaur, ETB1en eta eitb.eus-en

Amaitu berri duen denboraldian 'Hitzetik Hortzera'k Maialen Lujanbiori eskainitako saioa izango dugu ikusgai igande honetan, 15:00etan, ETB1en eta eitb.eus-en. Ia 30 urte bete ditu plazaz plaza kantuan, eta egindako ibilbide, mugarri eta asmoen inguruan ariko da hernaniarra Eider Perezekin.

«Egindako bidearen oroimen ederra daukat, lagunekin egin dut eta mugimendu eder baten parte sentitzen naiz», azalduko du programan. Hiru hamarkadako ibilbidean izandako mugarri artistikoei eta ideologikoei buruz ariko da solasean, baita hartu izan dituen erabaki, egindako ahalegin eta bizi izan duen inguruari buruz. Bat-batekotasunak dauzkan baldintza estuetatik ihes egiten uzten dioten proiektu pausatuek zer ematen dioten kontatuko du ere.

Baina nolako ibilbidea izan du igandeko elkarrizketatuak? 1992. urtean Hondarribian egin zuen Maialen Lujanbiok bere lehen plaza bertako emakume taldeak bultzatuta: «Niretzat oso garrantzitsua izan da Hondarribia eta bertako emakume taldea». Lehen plaza hartatik gaur egunera arte bertsolari bezala emandako teorizazio mailaren garatze prozesuan murgilduko gaitu igandeko saioan: «Teorizaziora esperientziatik iritsi naiz», dio.

Hein handi batean gizon artean ibilitako bide honetan izan dituen ezaugarriez galdetu, eta, noski, Euskal Herriko Bertsolari Txapelketan egindako ibilbide oparoari ere egingo zaio tartea: «2001eko Euskal Herriko Bertsolari Txapelketa Nagusian aurrerapauso bat eman nuen».

Gaur, 15:00etan, ETB1en eta eitb.eus-en, hitzordua bertsolaritzarekin eta Maialen Lujanbiorekin.