Julián de Zulueta gasteiztarraren erretratua ikusgai izango da Arte Ederren Museoan

Julian de Zulueta y Amondo gasteiztar ospetsuaren erretratua ikusgai izango da Arte Ederren museoan datorren urteko maiatzaren 31ra arte. Erretratua Federico de Madrazok egin zuen, garai hartan, erretratuen pintorerik onena zenak, eta Julian de Zulueta Arabako markes izendatu zutenean Espainiara egindako bidaian egin zion.

Erretratu hori Arte Ederren Museoak eskuratu du eta oraindik ez da ezagutzen. Erakusketa ez ezik, gaur, 12:00etan, Alfonso Sueskunek Julian de Zuluetaren bizitzari buruzko 'Narrazio pertsonalizatua' ere izango da Museoan bertan.

De Zulueta Araban jaio bazen ere, 18 urterekin La Habanara (Kuba) joan zen, bere osabak hala eskatu ziolako. Ez zuen ondorengorik eta haren lehen negozioak heredatu zituen. Handik urte gutxitara azukre-ekoizlerik garrantzitsuena bihurtu zen, eta esklaboak trafikatzen ere ibili zen. Politikaria ere izan zen Kuban, hala nola Ogasuneko kontseilaria eta La Habanako alkatea.

Beti egon zen Arabarekin harremanetan eta noizean behin bidaiak egiten zituen, izan ere, familia bertan zuen eta Arabako Gorteetarako diputatu ere izendatu zuten. Eta penintsulara egindako bidaia batean hain zuzen ere bere erretratua egitea eskatu zion Federico de Madrazori.

Bere alabetako bat Elvira Zulueta izan zen, 1941. urtetik Arabako Arte Ederren Museoaren egoitza den jauregiaren eraikuntza sustatu zuena, Ricardo Augustín bere senarrarekin batera. Julían de Zulueta 64 urterekin hil zen La Habanan, zaldi batetik erorita, eta bere hirugarren emazteari eta hamaika seme-alabei utzi zien Espainiako dirutzarik handienetako bat.