Euskaltzaindiaren 'Euskera' aldizkariak badu bere webgunea

Bizi garen garaiotan digitalizaziorantz pausoak ematen jarraitzeko beharraz jabetuta,, Euskaltzaindiak astelehen honetan iragarri du 'Euskera' ikerketa aldizkariak webgune propioa izango duela hemendik aurrera, Open Journal System (OJS) egituran txertatua. Bertan, agerkariari buruzko informazioa kontsultatu ahal izango da, hala nola helburuak, politika editoriala, idazketa arauak, talde editoriala, argitaratu diren eduki guztiak eta abar.

Euskaltzaindiko iturriek jakinarazi dutenez, ikerketa artikuluak argitaratzeko, aldizkariaren idazketa batzordeak, anonimotasuna bermatuz, kanpo ebaluatzaileen iritzia jasoko du 'double-blind peer review' sistema erabiliz. Eta zer da hori? Ikerketa-lanak ebaluatzeko sistema da, non lan bat lantzen ari den gaian adituak diren bi adituk ebaluazioa egiten duten.

OJS sistemari dagokionez, bestalde, esan behar dugu erraztu egiten duela aldizkariak datu base eta bilaketa motor desberdinetan indexatzea eta horrek areagotu egingo duela aldizkariaren irisgarritasuna, ezinbestekoa jende gehiagorengana iristeko. Horrez gain, artikuluei esleitutako metadatuei esker, edukiak errazago aurkitu eta berreskuratu ahal izango dira. Era honetara, hemendik aurrera datu base akademikoetan informazioa eguneratuta egongo dela eta irakurlearen esperientzia aberasgarriagoa izango dela, nabarmendu dute aldizkariaren arduradunek.

'Euskera' ikerketa aldizkariak bi zenbaki argitaratuko ditu urtero: lehena, urtarrila-ekaina aldiari dagokiona, eta bigarrena, uztaila-abendua aldikoa. 'Euskera' ikerketa aldizkariaren helburua ikerketa edukiak bizitza akademiko tradizionalaren eremuetatik bereiztea da. 2023. urteko lehen zenbaki honetan, euskal hizkuntzaren ikasketetan ikerlari esanguratsuek argitaratuko dituzte beren lanak: Andres Iñigo euskaltzain emerituak, Jabier Kaltzakorta Deustuko Unibertsitateko irakasle eta ikerlariak, Joseba Lakarra EHUko katedradunak, Ekaitz Santazilia Nafarroako Unibertsitate Publikoko ikerlariak eta Luis Mari Zaldua ikerlariak.

'Euskera' Euskaltzaindiaren agerkari ofiziala izan da 1920tik 2022ra bitartean. Beraz, ehun urtetik gorako bizitza du eta aldi historiko batzuk izan ditu. Garai historiko desberdinetan argitaraturiko edukiak kontsultagai izango dira webguneko hemeroteka atalean. 2023tik aurrera, aldiz, bi argitalpen izango dira: batetik,'Euskera' ikerketa aldizkaria eta, bestetik, Euskaltzaindiaren buletina. Ikerketa aldizkariak, Akademiaren lan esparruetako ikerketa artikulu originalak, liburu aipamenak eta antzekoak jasoko ditu, eta paperean eta euskarri informatikoan argitaratuko da; buletinak, aldiz, Euskaltzaindiaren jarduna eta bizitza akademikoa bilduko ditu eta modu elektronikoan argitaratuko da.

• Temas
• Euskera
• Euskaltzaindia