Bilboko tranbiaren Atxuri-Bolueta luzapenaren lanak irailean hasiko dira

Euskal Trenbide Sareak (ETS) Cycasa eta Bycam enpresek osatutako aldi baterako enpresen batasunari esleitu dio Bilboko tranbiaren Atxuri-Bolueta luzapenaren obra zibila, eta aurreikuspenen arabera, lanak irailean hasiko direla azaldu dute proiektuaren arduradunek. Antza, kostua 1,4 milioi eurokoa izango da, eta egikaritze epea 8,5 hilabetekoa.

Trazatuaren luzapena 2,3 kilometrokoa izango da, eta Atxuriko eta Boluetako geltokien egokitzapena ere barne hartuko du. Abusuko Ikastolaren inguruan eraikiko den geralekua laster esleituko da aparteko kontratu batean, egikaritze epe txikiagoa baitu horrek.

Eusko Jaurlaritzak eta Bilboko Udalak Atxuri-Bolueta tartea tranbiarako egokitzeko proiektua finantzatzeko eta eraikitzeko sinatutako lankidetza hitzarmenaren emaitza da jarduketa. Tarte hori ez da erabiltzen iazko irailetik, Bilbo Gernikarekin eta Bermeorekin lotzen duten Euskotrenen unitateak hiriburura 3. linearen bitartez sartzen hasi zirenetik. Arduradunen arabera, azpiegitura martxan jartzen denean, Bilboko tranbiak zortzi kilometroko sarea (orain 5,8 kilometrokoa da), eta 17 geraleku izango ditu, Bolueta eta Casilla artean.

Esan bezala, 2,3 kilometro da luzeko ibilbide berria Atxuriko geltokiko trenbide zabalgunean hasi eta Boluetan amaituko da, eta lanak, funtsean, trenbideko trazatua tranbiara egokitzea edo eraldatzea dira.

Atxuriko tranbiaren geralekuak gaur egun dagoen lekuan jarraituko du. 2014an mendeurrena bete zuen Manuel María Smithen eraikin historikoak, Eusko Trenbideak-Ferrocarriles Vascos sozietatearen bulego nagusiak eta tranbiaren beraren eta trenbidearen aginte postuak hartzen jarraituko du. Halaber, tranbiaren garajeek eta tailerrek gaur egungo lekuan jarraituko dute.

Egokitzapena egin ondoren, tranbia tren instalazio zaharreko trenbideetara sartuko da Atxurin, konexioa ahalbidetuko duen desbideratze baten bidez. Bestalde, tailerretara eta garajeetara sartzeko dauden desbideratzeek bertan jarraituko dute, tranbia zerbitzuarekin bateragarriak direlako eta trenbidea mantentzeko unitateen maniobrak ahalbidetzen dituztelako.

Bilboko metroaren ondoan dagoen Boluetako geltokia egokitzeko lanak egin beharko dira, trenbidean zein nasetan. Diseinatutako proiektuaren barruan sartzen dira, besteak beste, nasen altuera tranbiako material mugikorrera egokitzea eta nasetako ertzak tranbiekiko duten posizioa moldatzea.

Horrez gain, geralekua irisgarritasunari buruzko araudira egokitu beharko da, eta bidearen gainegitura material mugikor berrira eta bidearen mantentze lanetarako ibilgailuetara. Gainera, oinezkoentzako sarbide berriak eraikitzea aurreikusi da, Telleria kaletik nasetara.

Esleipenarekin, Kukullagako garajeetako lanen bitartez maiatzean hasi zen tranbia konexio berriaren operazioa burutuko da. Leku horretan egongo dira une honetan Atxurin dauden trenak. Horrela, ehun urte baino gehiagoko geltokiko trenbide zabalgunea libre geratuko da, tranbiaren trenbideak eta nasak egokitzeko.

Hain zuzen, etorkizunean tranbiak izango dira Atxurin egongo direnak. Proiektu honetan hainbat jarduketa batera gauzatzearen helburua epeak murriztea da, hain zuzen ere, tranbiako trazatu berria 2021ean zerbitzua ematen hasteko.

Hori nahikoa ez balitz, Euskal Trenbide Sareak azterlan bat aginduko du Los Caños pasealekuan uhartearen parean beste geraleku bat ezartzeko dagoen aukera ikusteko, bai eta Boluetako geltokiaren ingurua urbanizatzeko eta egokitzeko ere. Lan horiek gauzatuz gero, bigarren fase batean lizitatu eta esleituko lirateke.