Baserriko produktuen Azoka ospatuko da igande honetan Garaiko herrian

Gazta, txakolina, sagardoa, ortuariak, frutak, irina, garagardoa, ogia, txerrikiak, ahatekiak, askotariko kontserbak… Askotarikoak dira igande honetan Garaiko herrian aurkitu ahal izango diren produktuak. Bigarren urtez, Udalak eta Urkiola Landa Garapenerako Elkarteak lankidetzan antolatu dute Gabonetako azoka, Herriko Plazan egingo dena goizeko hamaiketatik aurrera. Osasun agintariek ezarritako aginduak betetzeko, antolatzaileek zirkuitu bat antolatu dute, nahitaez segitu beharko dena. Hurreratzen diren pertsonek maskara erabili beharko dute, eta, zirkuituaren toki desberdinetan, eskuak garbitzeko gela egongo da eskuragarri.

Antolatzaileen helburua lehen sektorea bultzatzea da, berton ekoitzitako elikagaiak merkaturatzen lagunduz. «Azoka txikia izango da, hamar bat postu izango ditu eta ekoizle guztiak Garai eta inguruko herrietakoak izango dira», adierazi dute udaletxeko iturriek.

Halaber, azaldu dutenez, Udalak baserritarrei eta elikagaien ekoizleei euren produktuak plazaratzeko eta saltzeko aukera eskaini nahi die, bai eta herriko biztanleei, eta, orokorrean, Durangaldekoei, urteko sasoi berezi honetan, kalitatezko elikagaiak eskuratzeko aukera ere. Era berean, bertoko produktuak erostera bultzatu nahi ditu kontsumitzaileak, baserritarrek kalitatezko produktuak ekoizteko egiten duten lana indartuz eta bertako askotariko jardueretatik eratorritako produktuen kontsumoa sustatuz. Azken finean, halako ekimenen bidez, Udalaren asmoa da «bertako produktu jasangarri eta osasuntsuen inguruan, kontzientzia indartzea, ustiategien bideragarritasunari laguntzea eta jasangarriagoa den elikadura eredu baten aldeko apustua egitea».

Berrikuntza gisa, aurtengo Gabonetako Azokan emakume baserritarren lana ikusarazteko ahalegina egin nahi da. Horrela, Azokaren eremu desberdinetan panel handi batzuk jarriko dira, non emakume baserritarren irudiak eta esaldiak azalduko diren.