Amorebietako hilerrian aurkitutako 86 gorpuetatik lehena identifikatu dute
Haren familiak maiatzaren 13an jasoko ditu gorpuzkiak, 18.00etan, Zelaieta zentroan
Amorebieta-Etxanoko hilerrian aurkitutako 86 gorpuetatik lehena identifikatu dute, eta haren familiak maiatzaren 13an jasoko ditu gorpuzkiak, 18.00etan, Zelaieta zentroan, Memoriaren Gogora Institutuak jakinarazi duenez.
Nerea Melgosa sailburuak eta Ainhoa Salterain Zornotzako alkateak parte hartuko dute ekitaldian, eta bertan izango dira, halaber, Aitor Miñambres eta Anton Erkoreka historialariak eta Aranzadi Zientzia Elkarteko Lourdes Herrasti antropologo eta udalerriko exhumazioen lanen arduraduna.
Aranzadi Zientzia Elkarteko hamar bat kidek, Paco Etxeberria auzitegi-medikua buru zutela, abenduan Gerra Zibilaren biktima izandako 54 gudari eta milizianoren gorpuzkiak aurkitu zituzten aipatutako hilerrian. Era berean, martxoan, ikertzaileek beste 32ren arrastoak topatu zituzten, eta astelehen honetan jakin izan dugu horietako lehena identifikatu dutela.
Amorebieta-Etxanoko hilerriko lanak bertan gerran hildako pertsonak lurperatu zituztela adierazten zuen dokumentazio historikoaren ondorioz hasi ziren. Esan bezala, gorpuak lurpetik ateratzeko lanak bi fasetan egin dira, eta gorpuzkiak eta hobian aurkitutako materiala aztertuta, hipotesia da udalerriaren inguruko gerra-fronteetan hildako gudariei dagozkiela, hala nola Bizkargiri edo Zornotzako ospitale militarrean hildako soldaduei.
Identifikatutako lehen gorpuzkiak senideei entregatzeko Zelaieta zentroan astelehenean egingo den ekitaldian, gainera, Amorebieta-Etxanoko lanen egungo egoeraren berri emango da. Azpimarratzekoa da Memoriaren Gogora Institutuak martxoan jakinarazi zuela inguru horretan desagertutako 35 familiarekin harremanetan jarri zela, eta horietako 17ren DNA lagina lortu zuela identifikazioetarako.
Halaber, desagertuen gertukoei institutuarekin harremanetan jartzeko eskatu die berriro, identifikatzeko prozesua has dezaten.
