'Nunavut' ikuskizuna, larunbatean, Lemoan
Ametsezko mundu utopikoa irudikatzen duen Myriam Perez dantzari eta zuzendariaren lana 20.00etan hasiko da Kotxepin kultur etxean. Sarrerak sei euro balio du eta dantza garaikidea, soinu artea, arte plastikoak eta ipuin kontalariak batuko dituzte ikuskizunean
Mikel Garcia
Jueves, 15 de junio 2023, 13:58
Neri(H)ari konpainiak 'Nunavut' ikuskizuna eskainiko du larunbatean, Lemoan. Emanaldia Kotxepin kultur etxean izango da 20.00etan eta sarrerak sei euro balio du. Interesa baldin baduzu, jakin ezazu salgai daudela webgune honetan.
Nunavut hitzak 'gure indarra' edo 'gure lurra' esan nahi du Kanadako Inuiten hizkuntzan. Neri(H)ari konpainiatik diotenez, «maitasuna, munstroak eta jolasa elkarrekin bizi diren leku utopiko bat eraikitzeko ahalegina da. Honetan ametsezko unibertso bat iradokitzen duten paisaiak agertzen dira, non denbora gelditzen den, eta soilik begiratu eta entzun daitekeen».
Leire Otamendi eta Olaia Valle dantzariak, eta Peru Galbete musikariak oholtzaratuko dute Myriam Perez zuzendariaren lana. Azken horrek esandakoaren arabera, dantza garaikidea, soinu artea, arte plastikoak eta ipuin kontalariak batzen dira ikuskizunean, eta, horretarako, Galbetek bere taldekideekin batera dantza egingo du 55 minutuz. Jantzien aukeraketan eta eszenen diseinuan Clara Virgili diseinatzaile kataluniarraren laguntza izango dute.
Diziplina anitzeko proiektu
Urte batzuetako koreografia-lanaren ondoren, Myriam Perezek bere konpainia sortu zuen 2016an, NERI(H)ARI izenekoa. Horretan diziplina anitzeko proiektuei lekua egin die, beste arte batzuekin lankidetzan, hala nola, musikarekin, zinemarekin, antzerkiarekin edo argazkigintzarekin.
Bere sorkuntza pertsonalei eskaintzen dien espazioa ere bada. 'Nunavut' ez ezik, Perezen proiektuak beste lau ikuskizun barne hartzen ditu, 'Nere azalean arrotz' (2017), 'Mutu' (2018), 'Iceberg' (2019) eta 'Hiru' (2021), eta bostgarren bat egiten ari da orain, '40. Bidegurutzea' izenekoa.
