Doncicek Jordanek bezala saskiratzen du... eta galdu ere bai

Bazen behin garai bat non Michael Jordanek partidak galtzen zituen. Play offetan gertatzen zitzaion gehien bat. Gogoratzen diren emanaldi ikusgarrienatariko batzuk sinatzen zituen, baina partida horiek ez zituen irabazten.

Adibide gisa, Birden, McHalen eta Parishen Celtics taldeari 63 puntu egin zizkion eguna. Indianako hegal ilehoriak ederki laburbildu zuen gertatutakoa partidaren amaieran. «Jainkoak gaur Michael Jordanez jantzita agertu zaigu».

Bostonekoek losintxetan desegin ziren Bullsen eskoltarekin bi arrazoi nabarmenengatik. Lehenengoa, Jordanek egun horretan hamarkada askotan gogoratuko zen partida bat jokatu zuela. Eta hori ezin zen ukatu. Bigarrena, partida Celticsek irabazi zutela. Bostonekoek bazekiten zer zen Jordanen puntu zorta galanta jasotzea eta partida ez galtzea. Ondo iruditzen zitzaien. Nola ez? Negozio bikaina zen. Play offeko serie horretan bertan, aurreko partidan, hiru egun lehenago, Air-ek 49 tanto egin zizkien partida eraman ezinik. Bostonek txapelketa hura irabazi zuen, 1986koa, Olajuwon gaztearen Rocketsen aurka.

Michael Jordanen lehen urte horiek gogoratzen dituen antzeko zerbait gertatzen ari zaio Luka Doncici. Mavsek, orduan Bullsek bezala, ez dute energia nahikoa titulua lortzeko. Izan ere, Warriors bezalako talde sendo eta beteranoen aurkako saskiratze bikainak ez dute ezertarako balio.

Historia errepikatu egiten da. Doncicek 40 puntutik gora lortzen ditu partida bakoitzeko, baina Curryk eta konpainiak bata bestearen atzetik irabazten dituzte lehiak. Ea noiz aurkitzen dituen Mark Cubanek, Dallaseko frankiziaren jabe xelebre eta aberatsak, Pippen eta Kukocen egungo baliokideak.

Zenbakiak izugarriak dira. Doncicek sei aldiz galdu du play offean 40 puntutik gora egin dituen zortzi egunetan. Sei asko dira, bai, baina zortzia da beldurrik handiena ematen duen zenbakia, zortzi aldiz 40 puntu baino gehiago saskiratzea oso gutxik lortu baitute historian.

Aurreko bi denboraldietan, esloveniarrak bost aldiz sartu zizkien 40 puntu baino gehiago Clippersi (bi partida bakarrik irabazi zituen arren). Aurten horrelako hiru partida daramatza: Sunsen aurka (45 puntu eta galdu) eta bi aldiz segidan Warriorsen kontra (42 lehen egunean, eta 40, bigarrenean).

Jordanek, 13 denboralditan , 38 aldiz gainditu zituen 40 puntuak play offetan. Lehenengo hiruretan, beti Bostonen aurka, galdu egin zuen. Hurrengo seiak Clevelandekoen kontra izan ziren, eta lautan irabazi zuen. 1989 hartan, beste hiru aldiz errepikatu zuen balentria Knicksen aurka, eta behin (46 puntu) 'Jordan Rules'ak asmatu zituzten Pistonsen aurka. 'Bad Boys'en arau haiek eufemismo hutsa baino ez ziren esateko Jordan gupidarik gabe joko zutela zelaiaren edozein bazterretan eta arauditik kanpo.

Jordanek saskiratze altuekin zuen idilioa bere karrera amaitu arte mantendu zuen. Lehenengo hirurak, 1986. urtean galdu bazituen, azken lauak 1997an irabazi zituen. Bullsak, orduan, talde heldu eta garaiezina ziren.

Temas

• Euskera
• Harmailatik (Sergio Eguia)