https://static.elcorreo.com/www/menu/img/zurekin-desktop.jpg

Kalean da 'Cosimoren katiuskak', Etxepare saria irabazitako albuma

Ana Ibañez Elosua eta Dani Martirena./Etxepare
Ana Ibañez Elosua eta Dani Martirena. / Etxepare

Ana Ibañez Elosua eta Dani Martirenaren obrak haurrentzako album ilustratuen lehiaketa irabazi zuen udan, eta orain Pamiela argitaletxeak plazaratu du

AMALIA IBARGUTXI

Ekainean jakinarazi zuen Etxepare sariaren antolatzaileek lehiaren irabazleak Ana Ibañez Elosua eta Dani Martirena zirela, 'Cosimoren katiuskak' obragatik. Nafarroako zenbait udaletako euskara zerbitzuek sortutako saria da, haurrentzako albumak saritzen direlarik. Orain berritasuna da Pamiela etxeak argitaratu egin duela lana.

Album ilustratu bezala ulertzen dira testua eta irudia elkarren osagarri dituzten lanak. Ibañez eta Martirenarenak Cosimo eta parke txiki bat ditu istorioko protagonista. Cosimok zuhaitz batean eraiki du etxola, eta hortik inguruari erreparatzen dio, Italo Calvinoren 'Il barone rampante' liburu ezagunaren erreferentzia gaurkotuta. Martiarena eta Ibañezek Cosimo haurrari «baliabide berriak eman dizkiote eta, gizartean kokatuz, edertasunaren aldarrikapena zabaldu dute», antolatzaileek nabarmendu dutenez.

Dani Martirena aurpegi ezaguna da, Euskal Telebistako albistegietan egiten baitu lan, oso estilo propioa erakutsita.

«Gogoetarako kontakizuna ere bada gaur saritzen ari garen obra hau, testuak poesia du, umorea eta jolasa: hitzekin jolasten du idazleak, irudiekin marrazkilariak. Biek album ilustratu baten ezaugarri nagusiak bikain erakusten dute, hau da, irakurlea adi egotearena eta heldu baten konpainia ezinbestekoa izatearena, xehetasun guztiak harrapatzea nahi baditugu», adierazi zuten sariaren berri ematerakoan.

Lehiaketan parte hartutako 19 lanen artetik hautatu zuten irabazlea. Aurtengo edizioan, epaimahaikide aritu ziren Leire Bilbao, Leire Salaberria eta Asun Agiriano. Besteak beste, azpimarratu zuten obra honi buruz, bai testuan baita ilustrazioan ere. «Aberatsak dira bi lengoaiak. Teknikoki ausarta, guztiak du zeresana, eta horregatik eskaintzen du irakurketa ugari; arriskatzen duen obra bat da, euskal idazle eta ilustratzaileen maila ondo baino hobeto erakusten duena».

Iruñeko Udalak Etxepare saria programaren baitan antolatzen duen Biko-Teka topaketetan hartu dute parte saridun biek; batak idazle moduan (Dani Martirena) eta besteak ilustratzaile lanetan (Ana Ibañez).

Temas

Euskera