Inoiz ezagutu den izarrik azkarrena aurkitu dute zenbait ikertzailek

Inoiz ezagutu den izarrik azkarrena aurkitu dute Koloniako Unibertsitateko eta Brnon dagoen Masarykeko Unibertsitateko zenbait ikertzailek. S4716 izena jarri diote, eta azaldu dutenez, 8.000 km/s-ko abiadura lor dezake. Ikerlana 'The Astrophysical Journal' aldizkarian argitaratu dute.

Aurkikuntza horri esker, Esne Bidearen erdi-erdian dagoen zulo beltzeko mugimendu azkarreko izarren orbitaren jatorriari eta bilakaerari buruzko informazio gehiago izango dute ikertzaileek. Azken batean, ia hogei urte daramatzate behaketak egiten eta aztertzeko metodoak etengabe hobetzen, eta aurkikuntza hori nolabaiteko saria izango da.

Bost teleskopioetatik behatu zuten zulo beltzaren inguruan bidaiatzen duen izarra, eta horietako bat, teleskopio handia zen, behaketa zehaztuagoak egin ahal izateko. Ustekabean aurkitu zuten izarra, zulo beltz baten inguruan orbita hain egonkor eta azkarrean izar bat egoteak ikertzaileak harritu zituelako.

Ikerlanean parte hartu zuen Michael Zajacek astrofisikariaren ustez, izarrak ez dira hain erraz sortzen zulo beltzaren inguruan. Horrenbestez, beste izar batzuei hurbildu behar izan zuen, eta horrek bere orbita nabarmen murriztea ekarri zuen. Orbita txikiagoa izanda, abiadura handiagoa ere lor zezakeen.

Datuei erreparatuta, izarrak lau urte bakarrik behar ditu Esne Bidearen zulo beltzaren inguruan orbita osoa emateko. Horrela, zulo beltzetik 99 eta 706 arteko unitate astronomikotara egoten da (Lurraren eta Eguzkiaren arteko batez besteko distantziaren baliokidea da unitate astronomikoa).

• Temas
• Euskera