https://static.elcorreo.com/www/menu/img/zurekin-desktop.jpg

Idoia Trenor eta Jon Agirresarobe Bertsozale Elkarteko koordinatzaile izendatu berri dituzte

Idoia Trenor eta Jon Agirresarobe Bertsozale Elkarteko koordinatzaile izendatu berri dituzte
Telepress

Aritz Zerain Minerrek Bertsozale Elkarteko koordinazio lana utzi eta erreleboa emango zuela iragarri zuen martxoan

UNAI SARRIUGARTE

Idoia Trenor eta Jon Agirresarobe Bertsozale Elkarteko koordinatzaile izendatu berri dituzte. Martxoan Aritz Zerain Minerrek Bertsozale Elkarteko koordinazio lana utzi egingo zuela iragarri zuen hamaika urte luzeren ondoren. Elkartearen dimentsio handia egokiago kudeatzeko eta mugimenduaren aurrerako beharrei hobeto erantzuteko, bi pertsonaren koordinazioaren dinamikaren alde egin du elkarteko zuzendaritzak.

Bertsozale Elkarteak datozen urteei eskarmentuz eta indar berriz ekingo die. Ezagutzaz eta bisio zabalez aurre egiteko moduan izango direla aurreikusten dute. Etorkizunak ekarriko dituen ezuste eta gorabeheren aurrean zuhur jokatuz eta lan eginez.

Idoia Trenor donostiarra Artearen Historian lizentziaduna eta Euskal Kulturgintzaren Transmisioan graduondokoa da. Gaztetatik hainbat elkartetako kide izan da. Azken urteotan euskalgintzan eta feminismoaren esparruetan dihardu lanean: Euskal Herriko Bilgune Feministan eta Bagera Donostiako Euskaltzaleen Elkartean esaterako.

Jon Agirrerosabe, berriz, Giza Zientziak eta Komunikazioan lizentziaduna eta Euskal Kulturgintzaren Transmisioan graduondokoa da. Egun Kultur Kudeaketako masterra ari da egiten. Euskadi Irratian aritu zen aurkezle lanetan. Azken hamaika urteak Bertsozale Elkartean bertan eman ditu, Sustapen Saileko eragile, eta azken hiru Bertsolari Txapelketa Nagusien koordinatzailea izan da besteak beste. Gainera, zenbait bertso txapelketetan gai-jartzaile izandakoa da.

Bertsozale Elkartea 1987. urtean jaio zen zen bertsoaren bitartez jasotako ondareak geroa izan dezan ziurtatzeko helburuarekin. Diru-irabazi asmorik gabeko erakunde sozio-kulturala da eta 2.500 bazkide inguru ditu gaur egun. Bertsolaritzaz arduratzen diren bestelako eragile guztiekin batera, bertsolaritza zaindu, sustatu, ikertu eta bere transmisioa eta etorkizuna bermatzea da Bertsozale Elkartearen xedea.

Euskal lurraldea da Bertsozale Elkartearen lan esparrua. Bi esparru bereizi behar dira bertan: kulturala eta geografikoa. Kultur esparruan bertsolaritzara mugatu da ia osoki, baina ahozkotasunaren alorrean ere beste zenbait ekarpen egin dira. Geografikoki, Euskal Herri osora hedatutako proiektua da Bertsozale Elkartearena, baina nazioarteko ekimenak ere sustatu ditu.