'Gazte arruntaren koplak', Chill Mafiak argitaratu berri du Xabier Leteren kantaren bertsio gaurkotua

Aspaldiko telesailen bertsio gaurkotuak ikustera ohartu gara azken boladan: 'Equipo A', 'MacGyver', 'Corrupción en Miami' eta 'Ángeles de Charlie' filmen 2.0 bertsioak gaztelaniaz ikusteko aukera eskaini zaigu, alegia. Kontua da berdin gertatu dela betiko abesti batzuekin, eta, oraingoan, Xabier Letek 1976. urtean plazaraturiko Kantatzera noazu diskoko 'Gizon arruntaren koplak' kantaren bertsio gaurkotua heldu zaigu, 'Gazte arruntaren koplak' izenburupean.

Chill Mafia taldeak kaleratu zuen igandean bertsio berriaren bideoklipa, eta horrela diote pixkanaka-pixkanaka Youtuben hazten dagoen kantaren bertsoek:

Kantatzera noazu bertso bat edo bi

herenegun jarri gazte arruntari

Julen, Xabier, Iñaki, Ander edo Matxin

gauza ederra denik ez ukatu niri

Goizean jaikitzean lehenbiziko gauza

Instagram ireki eta nolako zalantzak

neska gazte politen argazkiak, latzak,

Erreakzio pare bota eta sartzen naiz saltsan

Ohetikan altxatu eta armairua ireki

prozedura hura ulertu ezinik nabil

Lurrean hautsa hartzen arropa ugari

usai txarra isurtzean ez naiz jartzen larri

kolonia pixka bat eta kalera oso manin

Meme bat egiteko ez nabil oso mantso

sei kolektibok jo nahi ninduten atzo

Ronaldinho bezala ez begira eta ixo

Nahikoa daukat burutik izateaz gaixo

Kalera irtetean hau da komeria

munipa pare batek geldi nautenean

porruak, armak edo beste zerbait bila

nire 'Biosolan'-a aurkitu ezinean

bitamina falta nabaritu agian

Ez nindoan oso gaizki etxe eta ikastolan

gauza txarrak eginik lapurtzen altxorrak

futbolera jolasten ez banintzen ona

atezain jarriko naiz ez sartzeko gola

merendoletan drogak, Fanta, Coca-cola

Lana ederra egin dut unira joateko

drogak-eta saltzeko eta ere ikasteko

ikasi eta gero berriz ikasteko

aitaren etxera buelta lanik ez balego

azkenean familiarekin badaukat apego.

Ez da azken boladan taldeak atera duen kanta bakarra, eta, bideoekin datorren mezu bat kontuan hartzen badugu, ondoriozta daiteke otsailaren 14an Ezorregatik X berpizkundea izeneko lana plazaratuko dutela. Momentuz, dena den, Leteren bertsio gaurkotuarekin gozatzeko aukerarekin konformatu beharko gara.