Fermin Muguruzaren azken kontzertua Iruñeako Nafarroa Arenan izango da
Datorren urteko urriaren 4an emango dio amaiera bere ibilbidea ospatzeko nazioarteko birari. Hurrengo asteburuan, abenduaren 20an eta 21ean, Bilbao Arenan izango da
Fermin Muguruzak Iruñeako Nafarroa Arenan emango du bere ibilbidea ospatzeko nazioarteko biraren azken kontzertua, 2025eko urriaren 4an. Asteazken honetan iragarri zuenez, sarrerak hilaren 17an jarriko dituzte salgai muguruzafm.eus atarian, hain zuzen Miarritzen birako lehen kontzertua egingo duen egun berean.
Musikari gipuzkoarrak apirilean iragarri zuen hilabete honetan agertokietara itzuliko zela, baita Bilbao Arenan kontzertua eskainiko zuela ere. Bada, Miribillako bolorako 8.000 sarrerak ordu gutxitan agortu ondoren, bigarren kontzertu bat iragarri zuen toki berean hurrengo egunean, non tiketak minutu gutxitan saldu ziren.
Bi hilabete geroago, 2025ean nazioarteko bira eskainiko zuela jakinarazi zuen, eta asteazken honetan ibilbide hori Nafarroa Arenan amaituko dela jakin dugu. Kontzertu horietan, Bilbokoan bezala, artista irundarrak bere ibilbide osoa errepasatuko du Kortatu eta Negu Gorriaken hastapenetatik hasi eta bere bakarkako ekoizpen berrienetaraino.
Buenos Aires, Montevideo, Bogota...
Kontzertuei dagokienez, abenduaren 17an abiatuko du Muguruzak 'Fermin Muguruza. 40. urteurrena' bira Atabal aretoan (sarrerak amaituta daude), eta abenduaren 20an eta 21ean Bilbao Arenan izango da (sarrerak amaituta). Datorren urteari dagokionez, berriz, La Lagunako EC Aguere aretoan (Tenerife) izango da urtarrilaren 17an eta 18an, eta 24an Bartzelonako Palau Sant Jordin izango da. Otsailaren 15ean Madrilgo Wizink Centerren joko du, eta, martxoaren 15ean, Santiago de Compostelako Fontes do Sar aretoan. Ondoren, hilaren 21ean, Parisko La Cigalen; 22an, Bordeleko Salle du Grand Parcen; 28an, Tolouseko Le Bikinin, eta 29an, Marseillako Espace de Julienen. Halaber, apirilaren 12an Zuricheko Rote Fabriken izango da; 24an, Londresen eta 25ean Dublinen.
Maiatzaren 10ean Meridan egongo da eta 16an Berlingo S036n (sarrerak amaituta). Jarraian, hilaren 20an, zaleek Txileko Santiagoko Cariola Antzokian izango dute; 22an Montevideoko Sala del Museo del Carnaval. 24an, Buenos Airesko Obras Estadioan; 28an, Bogotako Calle 13n, eta 31n, Mexikoko Skatexen (Texcoco). Hori gutxi balitz, ekainaren 7an Erromako Circolo Concetto Marchesi ariko da eta 14an kontzertua eskainiko du Donostiako Anoeta estadioan eta uztailaren 23an Tokioko Radical Music Network-en izango dugu. Azkenik, asteazkenean jakinarazi zuen bezala, bira honen azken kontzertua urriaren 4an izango da Iruñeako Nafarroa Arenan.
Biraren aurkezpen bideoan, Muguruzak lagun handiak bildu zituen, besteak beste, Itziar Ituño, María Cruickshank, Aitziber Garmendia eta Jon Plazaola euskal aktoreak eta HOFE bezalako musikariak eta musika sektoreko jendea.
Eta iragarpenarekin nabarmendu zuenez, «ohore eta pribilegio bat izango da 40 urteko ibilbide hau agertoki baten gainean ospatu ahal izatea, oso kolpatua dagoen belaunaldi batekoa naizela jakinda. Kontzertu hauek guztiontzat bereziak izatea espero dut, musika, dantza eta errebindikazioaren bidez, oroimen kolektiboko ariketa bat, bizitzaren ospakizun bat eta faxismoaren arbuioa, besarkaden zeremonia bat».
Taula gainean, musikari hauek izango ditu lagun: Lide Hernando (gitarra eta koruak), Miryam 'Matah' (koruak), Víctor Navarrete (baxua), Gerard 'Chalart 58' (perkusioa eta dub), Xabi Solano (trikitixa), Jon Elizalde (tronboia), Aritz Lonbide (tronpeta), Igor Ruiz 'Fino' (saxoa) eta Gloria Maurel (bateria).
