Esloveniarra naiz, zertan nahi duzu irabaztea?

Bi milioi pertsona dira. Italia, Kroazia, Hungaria eta Adriatikoaren artean. Bi milioi. Euskal Herriko biztanleria baino gutxiago. Horregatik du hainbeste meritu hainbeste arrakasta lortzeak. Jan Oblak Atletico Madrileko atezaina ezagunena da, seguruenik Champioseko atezain onenaren sarirako izendatua, kontinenteko lehen mailan dagoela argi dago.

Jakina denez, futbola da kirolik ezagunena; futbolariak izaten dira jokalaririk nabarmenenak. Baina, egun, Eslovenia kirolaren munduko erdigunean badago, saskibaloia eta txirrindularitzagatik da. Kantxan, Luka Doncic NBAko izar handienetakoa, bosteko onenean sartu da aurten, iaz 'rookie onena' izan ostean. Goran Dragic, aldiz, liga irabazteko bidean da Miami Heat taldeko antolatzailea izanda. Azken Eurobasketa irabazi zutenean, iritsiko zenari buruz ohartarazi zuten, zalantzarik gabe.

Errepidean, Primoz Roglicek eta Tadej Pogacarrek irailera atzeratutako Tourra lehertu dute, eta inork ezin izan die itzalik egin. Ezta batailarik aurkeztu ere. Atzo eraman zuen Pogacarrek txapelketa, Pariseko Eliseo Zelaietan. Gaur 21 urte betetzen ditu. Zorionak, gazte.

Hala ere, badira beste kirolari batzuk, hain ezagunak ez direnak, kirola erlijio mailara igo dutenak Adriatikoko errepublika txikian. Petra Majdic fondoko eskiatzailea, adibidez, heroina nazional bihurtu zen orain dela hamarkada bat, Vancouverreko Neguko Jokoetan. Brontze bat irabazi zuen abiadurako proban. Ez zen dominagatik izan, dena den, idoloa bihurtu zela, baizik eta hori lortzeko moduagatik...

Bere probako entrenamenduan min hartu zuen eta lau saihets hautsi zituen, ondoren birika zulatu ziotenak. Lesio horiekin ere, ezerk ez zuen Petra geldiarazi, eta, egoera horretan, hirugarren izatea lortu zuen. Esloveniarra naiz. Zertan nahi duzu irabaztea?