https://static.elcorreo.com/www/menu/img/zurekin-desktop.jpg

'Gure Kasa'k 300. saioa ospatuko du gaur, ETB1en

'Gure Kasa'k 300. saioa ospatuko du gaur, ETB1en

Gonbidatu mordoa izango dituen bi orduko saio berezia eskainiko dute 21:15etik aurrera ETB1en eta eitb.eus-en

UNAI SARRIUGARTE

Eukal Irrati Telebistako 'Gure Kasa' programak 300. saioa ospatuko du gaur. Hori dela bide, gonbidatu berezi ugari izango dituen bi orduko saio berezia eskainiko dute. Telleria anaiek aurkeztutako telesailean Gorka Iraizoz futbolari ohia izango da gonbidatu nagusia. Era berean, Sebastian Lizaso bertsolaria, Yolanda Alzola telebistako aurkezlea eta Ylenia Baglietto eta Lander Otaola aktoreek hartuko dute parte. Saioa 21:15etik aurrera egongo da ikusgai ETB1en eta eitb.eus-en.

Ene Kantak eta Tio Teronen Semeak musika taldeek girotuko dute ikuskizuna musika emanaldi berezia eskainiz. Iñigo Vicensek 'fitcamp' berezia egingo du azken talde honetako dantzariekin batera. Gainera, Iban Garcia youtuberrak programaren 300. saioa omentzeko helburuarekin bideo berezi bat grabatu du 'Gure Kasa'ko lantaldearekin elkarlanean. Garciak kameraren aurrean eta atzean lan egiten duten pertsona guztiak bildu izan nahi ditu.

Isma Pereira, programa guztietan egiten duen bezalaxe, solasean arituko da gonbidatuekin. Mintzaldi honetan telleriatarrek eta Zuriñek hartuko dute esku. Bestalde, Onintza Enbeita bertsolaria 'tarotista'ren paperean ibiliko da eta bertsoekin uztartuko du jolasaldia. Halaber, Jon Gotzon Gaztea Irratiko 'Dida' progamaren aurkezleak estutasunean jarriko ditu gonbidatuak bere galdera bihurriekin.

Maddalen Arzallusek 'Abestien Zaindaria' jorratu du Euskal Herriko musikaririk ezagunenekin batera. Azkenik, Nahiara Gagok saioaren hemerota erabiliko du 300 programa hauetan 'Gure Kasa'tik igaro diren 400 gonbidatuekin bizitako momenturik onenak eta barregarrienak aditzera emateko.

'Gure Kasa' EITB1en igortzen den gazteentzako telebista saioa da. Julen Telleria eta Antton Telleria anaiak dira programaren aurkezleak, eta lehenengo hiru hilabeteetan Ainhoa Etxeberria ibili ohi zen telleriatarrekin aurkezle lanetan. 2017. urteko urrian estreinatu egin zen eta aurtengoa euren bigarren denboraldia da. Egun bizi duten arrakastak 300. saiora iristea egin du posible eta horrexegatik gaurkoa programa oso berezia izango da. Ikus-entzuleei eskerrak emateko aitzakia bat baita.