Durangaldeko Mankomunitateak 60 urtetik gorako pertsonei zuzenduta dauden etxetik egiteko ikastaroei ekingo die berriro

Maiatzean eta ekainean egin zen esperientzia pilotuaren balorazio positiboaren ondoren, Durangaldeko Mankomunitateak etxetik egiteko sei ikastaro jarriko ditu berriro martxan azaroan. Horiek telefono bidezko laguntzarekin egingo dira eta eskualdeko 60 urtetik gorakoei zuzenduta daude. Izan ere, bertatik adierazten dutenez, covid-19aren pandemiaren eraginez adinekoei zuzendutako jarduera guztiak berrikusi behar izan dituzte. Ondorioz, 'Nagusilan' programaren barruan dauden aurrez aurreko tailerrak bertan behera geratu dira, eta modu telematikoak ezarri dira jarraipena izan dezaten.

Telefono bidezko euskarria duten eta azaroan martxan jarriko diren ikastaroak ondorengoak dira: 'Memoria entrenatzen', 'Zelan egon lasai', 'Loa eta osasuna', 'Hazteko ipuinak' eta 'Elkarbizitza erraztuz'. Doako prestakuntza Abadiñon, Atxondon, Elorrion, Garain, Iurretan, Izurtzan, Mañarian, Otxandion eta Zaldibarren bizi diren 60 urtetik gorakoei egongo da zuzenduta.

Izena emateko epea azaroaren 6ra arte egongo da zabalik, 94 620 05 46 telefono zenbakira deituz –09.00etatik 13.00etara–, edo Durangaldeko Mankomunitateko ondorengo helbide elektronikoaren bitartez: terceraedad.mdurango@bizkaia.org

Ikastaroen helburua «kolektiboaren egoera psikofisikoa hobetzeko estrategiak ikastea da, koronabirusaren pandemiaren ondorioz sortutako ondorioak arintzen lagunduz», Mankomunitatearen esanetan. Ikastaro bakoitzak lau edo bost saio teoriko-praktiko izango ditu, eta izena ematen dutenek ohiko postaz edo emailez jasoko dituzte ikastaroko materialak, bakoitzaren aukeren arabera.

Pertsona bakoitzak profesional baten laguntza izango du, astero egingo diren ordu erdi inguruko telefono deien edo hainbat partaide izango dituzten 45 minutu inguruko taldeko bideo-deien bitartez. Prestakuntza euskaraz edo gaztelaniaz egin ahal izango da, eta irakasleen laguntzako deiak noiz jaso, goizez edo arratsaldez, aukeratu ahal izango da.