Dulantziko Antzerki Amateurraren Jaialdia azaroan izango da

Dulantziko (Araba) Antzerki Amateurraren Jaialdiaren hamalaugarren edizioa azaroaren 6etik 28ra bitartean ospatuko da aurten. Parte hartu nahi duten konpainiek ekainaren 30era arte izango dute lanak aurkezteko, epaimahaiak aztertu eta balora ditzan. Izan ere, aurkezpenak azaroaren 6an bertan hasiko dira, 19:30ean. Guztira, bederatzi konpainien lanak hautatuko ditu.

Profesionalak ez diren edozein tokitako konpainiek parte har dezakete, eta gehienez, bi lan aurkez ditzakete. Estiloa eta hizkuntza ere libreak dira, beraz, esaterako, haur zein nagusientzako lanak presta daitezke. Jaialdiaren helburu nagusia antzerkia sustatzeko kultur proiektu bat garatzea da, baina Dulantzi mota honetako antzerki-jaialdien euskal zirkuituan sartzea ere bada.

Esan bezala, aurkezpenak azaroaren 6an hasiko dira, eta asteburuetan izango dira, ostiraletik igandera, azaroaren 22ra arte. Amaierako ekitaldia azaroaren 28an izango da, eta egun horretan sariak ere banatu egingo dira. Ordutegiari dagokionez, amaierako ekitaldi hori eta aurkezpen orokorrak 19:30ean izango dira; haurrenak, berriz, 18:00etan.

Sariei dagokienez, 900 euro banatuko dizkiete parte hartzen duten bederatzi konpainiei, eta diploma bat parte hartzeagatik. Bestalde, bi muntaketarik onenak, gizonezko eta emakumezko aktore onenak, zein antzeztaldeko gizonezko zein emakumezko aktore onenentzat ere sariak egongo dira. Publikoak bere lanik gustukoena hautatuko du, eta sari berezia egongo da konpainiaren alderdi bikain bat nabarmentzeko.