Birziklatutako materialak erabiliz, 'Matraka Culinary Center' izeneko kontzertua, hil amaieran, Lemoan

Birziklatutako materialak erabiliz, 'Matraka Culinary Center' izeneko kontzertua izango da apirilaren 29an, Lemoako Kotxepin Kultur Etxean. Kontzertua 18.30ean hasiko da, Trakamatrakaren eskutik. Gutxi gorabehera ordubeteko emanaldia izango da, eta bertaratzeko sarrerak aldez aurretik eskura daitezke, hemen. Sarreren prezioari dagokionez, helduek 6 euro ordaindu behar dituzte, Kotxepin lagunek 4,20 euro, umeek 3 euro eta Kotxepin txikikoek 2,10 euro.

Kontzertua, 'Matraka Culinary Center' izenekoa, sukaldearekin lotuta egongo da, eta beraz, ez dira faltako sukaldeko materialez egindako musika-tresnak ere. Trakamatrakaren beste ikuskizunetan bezala, umorea nagusi izango da musika eta birziklapena bateratzen dituen bere proiektuan. Taldeak prestaturiko azken lana da, eta oraindik estreinatu gabe dago, baina aurrekoetan bezala, bizi garen munduari buruzko gogoeta egingo du.

Jon Urrutiak sortu zuen Trakamatraka taldea, eta, kontzertuez gain, tailerrak ere antolatzen ditu. Horietan guztietan, besteak beste, sormena eta irudimena, musikaren aniztasuna eta ingurumenarekiko errespetua jorratzen ditu, izan ere, edozer material birziklatzen du musika sortzeko. Esaterako, mahukak, jogurtak, potoen tapak, ontziak eta tutuak erabiltzen ditu. Azken batean, musika modu dibertigarri batean hurbiltzea, eta birziklatzearen aurrean kontzientziatzea da helburua.

Gitarra eta biolina jotzen ikasi zuen Urrutiak Bilboko Juan Crisostomo de Arriaga Musika Kontserbatorioan, baina horrez gain, Musika Hezkuntza eta Antropologia ikasketak ere egin zituen Deustuko Unibertsitatean.

Hainbat musika-tresna ikertzeari ekin dio betidanik, eta, besteak beste, perkusio instrumentuak, haize-instrumentuak, armonia, konposizio-teknikak, moldaketak eta bestelakoak aztertu ditu.

• Temas
• Euskera
• Lemoa