BCCk ardoaren campusen egoitzak diseinatzeko lehiaketa abiarazi du
Gasteizko eta Guardiako eraikinak egiteko soluzioak ematen dituzten proposamen onenak hautatzea da helburua, betiere jasangarritasunaren, funtzionaltasunaren, teknologiaren, ingurumenaren eta estetikaren ikuspegietatik
Jan Echevarría
Asteazkena, 3 urtarrila 2024, 18:02
Duela egun batzuk jakin genuen ardoaren campusaren etorkizuneko egoitzak behin betiko ordezkatuko zuela BAI Center (Business & Arts International Center), Gasteizen huts egindako proiektu handienetako bat. Bada, asteazken honetan Basque Culinary Centerrek EDA Drinks & Wine Campus hori egiteko diseinu arkitektonikoko lehiaketa publikatu du, Gasteizko eta Guardiako eraikinak egiteko soluzioak ematen dituzten proposamen onenak hautatzeko, betiere jasangarritasunaren, funtzionaltasunaren, teknologiaren, ingurumenaren eta estetikaren ikuspegietatik.
Nazioarteko arkitektura-lehiaketa ireki bat da, eta haren helburua da proposamen arkitektoniko bakar bat hautatzea, bi egoitzak ikuspegi eta kontzeptu berean barne hartuko dituena, proiektuaren ikuspuntuarekin bat etorriko dena eta lurraldean erreferente izango diren espazioak ekarriko dituena.
Ekimenaren arduradunek nabarmendu dutenez, «arkitektura-proiektuek talentua, ekintzailetza, ikerketa eta berrikuntza erakarriko dituzten espazio ireki eta bereziak sortu beharko dituzte. Jasangarritasuna izango da bi eraikinek bete beharreko balio eta irizpide nagusietako bat. Gainera, hiri- eta landa-paisaian modu organikoan eta, batez ere, zuzeneko ingurunean parte hartuz integratu beharko dute», esan dute.
Lehiaketaren xedea da, halaber, EDAk Araba eta Euskadi edarien alorrean aparteko eskualde gisa posizionatzeko duen ikuspegia gauzatuko duten diseinu arkitektoniko bikainak hautatzea.
Abangoardiako espazio bat
Guardiako egoitzari dagokionez, Ardoaren Etxetik gertu dagoen gune batean kokatuko da, 4.000 m2-ko lursail batean. Eraikin berriak 2.500 m2 izango ditu. EDAren Gasteizko egoitzak, bestalde, 8.610 m2 izango ditu, eta Lakua auzoan egongo da, autobus-geltokiaren ondoan (Eusko Jarlaritza parean).
Antolatzaileen arabera, «mundu guztiko arkitektura-estudioek eta diseinu-ekipoek parte har dezakete lehiaketan. Bikaintasun akademikoa, berrikuntza eta jasangarritasunarekiko konpromisoa bateratuko dituen abangoardiako espazio bat sortzen laguntzeko aukera paregabea izango da erronka handi honetan parte hartzea».
