Anton Telleriaren 'Ninini' ikuskizuna aurkeztu du: «Egolatriari eginiko oda bat da»

Antton Telleria (Tolosa, 1993) aurkezle eta umoregileak bakarrizketa berria estreinatuko du udazkenean. Hala iragarri zuen ostegun honetan bere sare sozialetan eta interesdunek jakin behar dute Gasteizko Jimmy Jazz aretoan egongo dela irailaren 27an (ostirala); Donostiako Lugaritz Kultur Etxean, urriaren 4 eta 5ean (ostirala eta larunbata); Bilboko Campos Antzokian, urriaren 17an (osteguna); Urruñako Itsasmendi zineman, urriaren 18an (ostirala), eta Iruñeako Escuela de Teatron, urriaren 26an (larunbata).

Telleriaren mezua honako hau izan zen: «Kaixo denoi, aspaldi da ezer berririk iragartzen ez dudala eta gaur aurkeztu nahi dizuet orain arteko proiektu ausart eta pertsonalena: nire perfumea. Hau da nire perfumea, hau da 'Ninini'. Baten batek pentsa lezake burua galdu ote dudan, baina betidanik gustatu izan zait publikoarekin harreman gertukoa izatea. Bide berri bat abiatu dut eta nahiko nuke bide berri horretan elkar topatuko bagenu. Informazio gehiago nahi baduzu, bisitatu nire webgunea».

Azpimarratzekoa da 2021eko apirilean eskaini zuela Telleriak 'Nekatutak' bakarrizketako lehen emanaldia. Ordutik ia bi urtez 55 emanaldi baino gehiago eskaini ditu eta guztietan zuzentasunaren mugak sarri-sarri esploratu ditu eta gutxi izan dira jorratu gabe utzitako gaiak: psikologoak, ETA, Ertzaintza... eta ziurrenik polemika gehien piztu dutenak: irakasleak.

Dena den, aurreratu duenez bigarren honek «zerikusi gutxi» izango du. «Ikuskizun hau desberdina da. Konkretuki, okerragoa. Ninini egolatriari eginiko oda bat da». Halaber, ikuskizunaren arduradunek diote Antton «biluztu» egingo dela. Metaforikoki eta metaforikoki soilik, denon hobebeharrez. Hitz egingo digu bere buruarekin duen harremanaz, bere izenaz, bere bikotekideaz, komikoa izateaz eta bertsolaria ez izateaz».

• Temas
• Euskera