Hazparneko Bertso Eguna datorren urtera atzeratu dute

Pandemiak eragindako ezegonkortasunak gure planetako asko bertan behera uzten jarraitzen du, eta beste behin ere, jarduera bat atzeratzea deitoratu behar dugu. Kasu honetan, Bertsozale Elkarteak erabaki du maiatzaren 22an Hazparnen (Lapurdi) ospatu behar zen Bertso Eguna datorren urtera atzeratzea, data zehatzik gabe, gaur egun Ipar Euskal Herrian dagoen osasun egoerak ez duelako emanaldia egitea ahalbidetzen.

Bertsozale Elkarteak jakinarazi duenez, ez da emanaldia dataz mugitzen den lehen aldia. Berez, urteko lehen Bertso Eguna izan behar zuen Hazparnekoak, eta orduan, arrazoi berberengatik ezin eginda, maiatzera atzeratu zen saioa, udaberrian egoera hobea izan zitekeelakoan.

Ez da horrela izan, ordea, eta, esan bezala, azkenean, Hazparneko Bertso Eguna datorren urtera atzeratzea hobetsi da. Saiorako sarrera erosita baduzu, lasai, antolatzaileek adierazi baitute dirua itzuliko zaizuela.

Hazparnekoaz gain, Iruñean eta Getarian ere antolatu dira Bertso Egunak 2021ean, otsailean eta martxoan, hurrenez hurren. «Pandemiak kulturan eta bertsolaritzan utzi duen arrastoa leuntzeko eta plaza indartzeko apustuaren baitan» kokatzen da hiru emanaldiok prestatzeko ahalegina.

Helburu berarekin sortu ditu Bertsozale Elkarteak beste hainbat ekimen ere: Eskolarteko finalean parte hartu ezinik geratu ziren gazteentzako 'Eskolatik Plazara'; proposamen berritzaileak plazaratzeko 'Bidaiak' bertso saioak; edota maiatzaren 6an lehen saioa izango duen 'Gerturatu Eta Lau' ekimen parte hartzailea.