Durangoko Ibilaldiak 17.000 bidaia eragin ditu Euskotreneko tren zerbitzuetan

Durangon joan den igandean ospatu zen Ibilaldiak Eusko Jaurlaritzako Ingurumen eta Lurralde Politika Sailaren esku dagoen Euskotreneko tren zerbitzuetan ia 17.000 bidaia eragin ditu. Zerbitzu horiek Bilbo-Durango-Eibar eta Bermeo-Durango lineatan eskaini ziren.

Euskotrenek jakinarazi duenez, Ibilaldia ospatu zen egunean zehar 16.931 bidaia erregistratu ziren guztira. Horietatik %93 kontaktu gabeko garraio txartelak eramanez egin ziren, eta gainerako %7 Ibilaldiko joaneko tituluarekin. Hain zuzen ere, joan den ostegunean, maiatzaren 26an, abian jarri ondoren, Euskotreneko Linea Orokorrean hiru euskal txartelen interoperabilitatea funtzionamenduan egon den lehen asteburua izan da.