https://static.elcorreo.com/www/menu/img/zurekin-desktop.jpg

Zientziaren aurpegi guztiak eztabaidagai

Zientziaren aurpegi guztiak eztabaidagai
Fotolia

Bizkaia Zientzia Plaza irailaren 13tik 29ra egingo da Euskalduna Jauregian, EHUko Bizkaia Aretoan eta Ondarroa, Durango eta Igorren

AMALIA IBARGUTXI

Zientziaren alde samurrena erakusteko ekimena da Bizkaia Zientzia Plaza. Adin guztietako zientzia-zaleak elkartzea du xede, dibulgazio zientifikoko jaialdi izatea, hain zuzen. Irailaren 13tik 29ra egingo da jardunaldion bigarren edizioa Euskalduna Jauregian, Euskal Herriko Unibertsitateko Bizkaia Aretoan, eta lurraldeko beste hainbat udalerritan ere bai. Guztira, zazpi ekitaldi egingo dira, denak doakoak, eta zientziaren esparruko ehun hizlari eta gonbidatutik gora ere bertaratuko dira Bizkaira.

Jarduera zientifikoaren alor desberdinak jorratuko dituzte, hainbat erregistro eta formatu baliatuta, hala nola hitzaldiak, ikuskizunak eta tailerrak. Zientziaren «agertoki» bilakatu nahi dute hiria, eta hain zuzen, 'Ciencia show'-eko bakarrizketa zientifikoak izango dira taularatutako lehen ikuskizunak. Hilaren 13an, Euskalduna Jauregian egingo da, bigarren hezkuntzako ikasleen parte-hartzearekin.

Bereziki nabarmentzen ditu antolakuntza taldeak 'Naukas Bilbao' hitzaldi dibulgatiboak, gaztelaniaz burutzen den dibulgazio zientifikoko ekitaldi nagusia. Aurtengoa zortzigarren edizioa izango dute, irailaren 14an eta 15ean. Iaz bi saioetako bakoitzean 2.000 pertsona bildu zituzten, aurreko urteetan bertaratuen kopurua hirukoiztuz.

Ikertzaile ezagunak

Naukas Bilbao baino lehen, irailaren 13an, 'Naukas PRO' ekitaldiak zientziaren jardun profesionalaren inguruko hainbat ikuspegi jarriko ditu eztabaidaren erdigunean. Zentro zientifikoetako ikertzaile ezagunek haien lanaren inguruko 20 minutuko hitzaldiak eskainiko dituzte. Bertan izango da, adibidez, Alicia Sintes 2017ko Fisikako Nobel sariduna. Grabitazio-uhinen detekzioan parte hartu duen talde zientifiko nazional bakarraren fisikaria eta zuzendaria da, eta hurrengo Medikuntza edo Fisiologiako Nobel sarirako hautagai izango dela dioenik bada jada. Iragarri dutenez, Alacanteko Unibertsitateko mikrobiologo eta ikertzaileak parte-hartze «berezia» egingo du Naukas Bilbaon.

Bestalde, Juan Carlos Ortega umoristak ere parte hartuko du, baita Edzard Ernst medikuntza-katedradun eta medikuntza alternatiboaren alorreko ikertzaile adituak ere. Bigarren hezkuntzako ikasleen 'Ciencia Show' bakarrizketa lehiaketaren finala, eta nerabeei zientziarekin modu dibertigarrian ikastea posible dela frogatzea helburu duten ekitaldiak ere prestatu dituzte.

Euskal Herriko Unibertsitateko Bizkaia Aretoan, irailaren 16an, Scenio ekitaldiaren bigarren edizioa izango da. Bertan, ezohiko ikuspuntuetatik jorratuko dute zientzia, jarduera zientifikoa eta dibertsioa uztartuta, sormenezko dibulgaziorako pentsatutako espazio batean.

'Jakinduriek mundue erreko dau!' bertsozientzia ekimena irailaren 20tik 29ra Ondarroara, Durangora eta Igorrera iritsiko da bertsolaritzaren eta zientziaren arteko fusioaren inguruan hausnartzeko.

Contenido Patrocinado

Fotos

Vídeos