https://static.elcorreo.com/www/menu/img/zurekin-desktop.jpg

'Youtubeskolak', plataforman euskararen erabilera sustatzeko ekimena heltzear dago Bizkaiara

Emakume bat bideo bat grabatzen./Fotolia
Emakume bat bideo bat grabatzen. / Fotolia

Ikastaroak Bizkaiko bost udalerritan emango dira urrian, eta Basauri, Durango eta Zornotzako udalekin eta Enkarterriko eta Txorierriko mankomunitateekin batera burutuko dira

UNAI SARRIUGARTE

Bizkaiko Foru Aldundiak eta Azkue Fundazioak elkarlanean Youtuberi buruzko ikastaroak eskainiko dituzte urrian. Ikastaroak Bizkaiko bost udalerritan emango dira. Hauexek Basauri, Durango eta Amorebieta-Etxanoko udalekin eta Enkarterriko eta Txorierriko mankomunitateekin batera burutuko dira. Gainera, Youtube bidezko lehiaketa bat abiatuko dute urrian eta azaroan. Hauxe 13 urtetik 16ra bideratutako lehiaketa izango da.

YouTube plataforman euskararen erabilera sustatu eta bultzatzeko helburuarekin sortu da Youtubeskolak egitasmoa. Izan ere, egun Youtube gazteek euren aisialdian ikus-entzunezko eduki ezberdinak ikusteko, gehien erabiltzen duten kanaletako bat da.

Lehiaketa honetan esku hartuko dutenek parada izango dute YouTuben bideoak sortzeko, editatzeko, ekoizteko eta post-produzitzeko eta kanalak abiarazi eta kudeatzeko. Bertan gai oso interesgarriak jorratuko dira. Lehiaketa honetan esku hartuko dutenek gai konkretu baten inguruko bideo bat landu behar izango dute.

Halaber, sari ezberdinak banatuko dituzte. 12-14 urte bitartekoentzat garaikur bat eta, 15-16 urtekoentzat beste sari bat egongo da. Era berean, hirugarren aitortza bat ere egongo da, Youtuber Bizkaitarraren Bideorik Onena izango dena. Bi irabazleek Iphone 7 Plus bana jasoko dute, eta Youtuber Bizkaitar onenak, berriz, kamera bat, GoPro Hero 7 Black izenekoa jasoko du.

Irabazleak jai berezi batean iragarriko dira eta sari-banaketa ere bertan emango da. Festa berezi hauxe azaroaren 30ean ospatuko da Bilboko Euskararen Etxean.