'Vintage Brothers' ikuskizuna izango da ostiralean Berantevillako plazan

Circo Los konpainia 2006. urtean sortu zen Brasilen, «La historia de los tigres de circo» ikuskizunarekin. Geroago, «Memorias de un tigre de circo» prestatu zuten, baina «Cabaret parodia» izeneko lanarekin hasi zen konpainia arrakasta lortzen. Ordubete baino zertxobait gehiagoko ikuskizunean hiru artista bakarrik aritzen dira, kabaret formatuarekin. Umorea, poesia bisuala eta zirku teknikak nagusi dira.

Ikuskizun handiekin lortu zuten arrakasta ikusirik, formatu txikiko ikuskizunak ere prestatzen hasi ziren, hala nola «Circo Sol», «Barreja» eta ostiralean ikusgai izango dugun «Vintage Brothers». Antonio Correa Firmino eta Igor Buzato dira arituko diren artistak.

Correa Firmino Rio de Janeiroko Zirku Eskola Nazionalean prestatu zen, lurreko akrobazia, minitranpolin, tranpolin, malabarak eta monoziklo espezialitateetan. Zenbait zirkutan aritu zen lanean eta azkenean Espainiara etorri zen, beste konpainia batzuetan kolaboratzaile gisa aritzeko. Bestalde, Buzato, Rio de Janeiroko Zirku Eskola Nazionalean ere prestatu zen, airetiko koadrante, trapezio bolante handi, tranpolin eta patin akrobatikoko espezialitateetan. Aurrekoak bezala zenbait zirkutan lan egin du, besteak beste Brasilen, Portugalen, Katalunian, Frantzian eta Danimarkan.