https://static.elcorreo.com/www/menu/img/zurekin-desktop.jpg

Urtaranen gobernuak Forondako aireportuko hegaldi erregularren jarduerarekiko konpromisoa berritu du

Urtaranen gobernuak Forondako aireportuko hegaldi erregularren jarduerarekiko konpromisoa berritu du

SERGIO EGUÍA

Tokiko Gobernu Batzarrak onetsi du VIA (Vitoria International Airport) sozietateari 250.000 euroko transferentzia egitea, horixe baita Gasteizko Udalaren urte honetako ekarpen ekonomikoa Ryanair konpainiak estatu barruko zein nazioarteko hegaldi erregularren jarduera gara dezan. 2020ra arte iraungo duen kontratuaren lehen urtekoari dagokio kopuru hori.

Abian jarri zenetik, hegaldi erregular komertzialen operatibaren barruan Milan (Bergamo), Tenerife, Colonia eta Sevillarako bidaiak antolatu ahal izan dira Gasteiztik. Atzoko datuen arabera, orotara 53.206 pertsona garraiatu dituzte, eta hegaldi bakoitzaren batez besteko okupazioa % 90 izan da. Horri charter hegaldiak eta IMSERSOren mendekoak gehitu behar zaizkio. Hori guztia dela eta, Gasteizko aireportuak kopuru errekorrak lortuko ditu 2017ko amaieran, bai bidaiarien bai salgaien garraioari dagokionez.

“Forondan hegaldi erregularrak berreskuratzea gobernu taldeak —Eusko Jaurlaritzarekin eta Arabako Foru Aldundiarekin batera— Gasteizko aireportuarekin duen konpromisoaren isla da. Hiru erakundeen ahalegin ekonomikoari esker, gure aireportua gorantz doa, zama operazioetan ez ezik, baita bidaiarien garraioan ere. Foronda erakargarria da berriro, logistika enpresen, euskal erakundeen eta aire-konpainien inplikazioari esker. Lan egiten eta inplikatzen jarraituko dugu, aireportua merezi duen lekuan jartzeko. Horregatik, funtsezkotzat jotzen ditugun alderdiak eskatzen jarraituko dugu, hala nola 24 orduko jarduna eta PIF (mugak ikuskatzeko postua) berreskuratzea”, adierazi du Enpleguaren eta Garapen Ekonomiko Iraunkorraren zinegotzi Nerea Melgosak.

Onetsitako 250.000 euroko ekarpenaz gain, uztailean 60.000 euro eman zizkion Gasteizko Udalak VIAri, aireportua bultzatzen laguntzearren, bai zamaren bai bidaiarien garraiorako.

Contenido Patrocinado

Fotos

Vídeos