https://static.elcorreo.com/www/menu/img/zurekin-desktop.jpg

Zetazeoak ikusteko bisitaldiak, Urdaibaiko Ekoetxean

Urdaibaiko Ekoetxea./Europa Press
Urdaibaiko Ekoetxea. / Europa Press

Irteerak urrira arte eskainiko dira eta helburua ugaztun espezie hauen kontserbazioak duen garrantziaz jabetzea da

UNAI SARRIUGARTE

Urdaibaiko Ekoetxeak, verballenas.com-ek eta Hegaluze nautika enpresak 'Zetazeoak 10etan' kanpaina abiarazi dute urrira arte. Bisitaldi hauek Bermeoko portutik irteten dira apirilaren lehenengo astetik eta itsasotik hainbat zetazeo ikusteko aukera eskaintzen dute.

Ekimenaren helburua ugaztun espezie hauen kontserbazioak duen garrantziaz jabetzea da. Horretarako, irteerak antolatuko dira hurrengo hilabeteetan euskal kostaldeetatik hurbil dabiltzan zetazeoak ikuskatzeko. Gainera, Urdaibaiko Ekoetxeak emango dituen azalpenei esker, euskal kostaldeetako itsas faunak duen aberastasuna ezagutzeko abagunea egongo da.

Aurtengo udaldian bi irteera mota eskainiko dira. Batetik, 'Zetazeoak 10etan' ekimenean lau ordu eta erdiko ibilbidea izango dugu. Parte hartzaileek 7 urtetik gora izan beharko dituzte izen ematerako orduan eta irteeraren prezioa 40 eurokoa izango da helduen kasuan, eta 7 eta 12 urte bitarteko umeek 28 euro ordainduko dituzte.

Bestetik, 'Zetazeoak 10etan PRO' izeneko ekintza espezializatuan parte hartzeko aukera egongo da. Tour honen bidez interesdunek Bizkaiko kostaldean dauden itsas faunek eskaintzen duten aberastasuna ikusi ahal izango dute. Ibilbide honek 6 orduko iraupena izango du eta 2.000 metroko sakoneran bizi diren hainbat espezie aztertuko dira. Irteera honetan, 16 urtetik gora duten pertsonek soilik har dezakete parte eta bisitaldiaren prezioa 48 eurokoa izango da pertsona bakoitzeko.

Ikustaldiak Urdaibaiko Ekoetxearen webgunean iragarriko dira. Bisitaldi bakoitzean plazak mugatuak izango dira eta izena aurretik eman beharko da. Era berean, arrazoi meteorologikoak edo itsasoaren egoera desegokia direla eta, antolakuntzak irteera bertan behera uzteko edota aldatzeko eskubidea izango du.

Iazko denboraldian, Urdaibaiko Ekoetxeak antolatutako 15 irteeretan 776 pertsonak hartu zuten parte. Hasiera batean, 24 bisitaldi aurreikusita zeuden, baina hauetako bederatzi, itsaso edota eguraldi txarraren ondorioz, eten egin ziren. Parte hartzaileen %93 pozik geratu zen eskainitako zerbitzuengatik.

Iazko bisitaldietan, zazpi zetazeo espezie behatu zituzten. Hauen artean nabarmentzekoak dira: Cuvier-eko zifioak, Izurde handia, Izurde muturmotza eta Sowerby-ko zifioak. Azken bi espezie hauen behaketak bereziki azpimarratzekoak dira. Izan ere, oso zailak da ingurune naturalean hauek ikustea.

Temas

Euskera