https://static.elcorreo.com/www/menu/img/zurekin-desktop.jpg

Unibertsitate aurreko euskarazko materialen dokumentazio zentroak mailegu zerbitzu berria dauka

Unibertsitate aurreko euskarazko materialen dokumentazio zentroak mailegu zerbitzu berria dauka
EIMA

EIMA Katalogoak 25.000 erreferentzia inguru ditu eta mailegu zerbitzuaz aparte, webgune berria estreinatu du

EL CORREO

EIMA Katalogoak, Unibertsitate aurreko mailetarako euskarazko ikasmaterialen dokumentazio-zentroak, martxan dauka mailegu-zerbitzu berria, eta horrekin batera, baita webgune berritua ere: eimakatalogoa.eus. Hezkuntza-komunitatearentzat pentsaturiko baliabide erabilgarri honek katalogatutako hainbat material edozein herritarren eskura ere ipintzen du. Eta datuak ez dira nolanahikoak: gaur egun, katalogoak 25.000 erreferentzia ditu, eta horietatik 4.000 inguru sarean kontsultatu edo deskargatu daitezke. Zehazki, askotariko baliabideak dira EIMA Katalogoan jasorikoak. Besteak beste, eskolan erabiltzeko sortutako materiala: testu-liburuak, ariketa-koadernoak, aplikazio informatikoak... orotara 9.300 erreferentzia dituena; sareko hainbat baliabide didaktiko: webguneak, simulazioak, jolasak... (1.200 erreferentzia); haur eta gazte-literatura, adin-tarteka eta gaika sailkatuta (4.700 erreferentzia); helduentzako literatura (2.800 erreferentzia); monografiak (5.900 erreferentzia); ikus-entzunezkoak (2.300 erreferentzia) eta jolas didaktikoak (190 erreferentzia).

Katalogoaren arduradunek diotenaren arabera, proiektuak euskarazko ikasmaterialen informazio zehatza eskaintzeaz gain, hainbat eta hainbat ikasmaterial zuzenean kontsultatzeko edota jaisteko aukera ere ematen du. Webgune berritua dauka horretarako EIMA Katalogoak eta webgune berritu horretan katalogatuta dauden 25.000 dokumentuen artean kontsultak ikasmailen, jakintza- gaien, ikasmaterial moten, argitaletxeen, edo egileen arabera egin daitezke. Izan ere, bertan errazago egingo zaio erabiltzaileari katalogoko materialak bilatzea eta eskatzea, «intuitiboa eta erabilerraza» baita plataforma berria.

Gauzak horrela, arduradunen arabera, interneten eskuragarri dauden materialak badira, bertatik bertara eskuratu daitezke; materiala euskarri fisikoan badago, eimakatalogoa.eus webgunetik eskatu ahal izango du interesdunak eta erabiltzaileak nahi duen material hori aurkitzen ez badu, EIMA Katalogoarekin harremanetan jar daiteke, lortzen saia daitezen. Katalogoaren dokumentazio-zentroak Eibarren du egoitza (Eibarko Hezkuntza Esparruan, Otalora hiribidea, 29), eta irekita dago bertaratu nahi duen edozein herritarrentzat. Materialak kontsultatu eta maileguan har daitezke bertan.

Dena den, EIMA Katalogoa Unibertsitate aurreko mailetarako euskarazko ikasmaterialen dokumentazio-zentroa bada, edozein pertsonak erabili dezake? Bai. Egia da bereziki hezkuntza-komunitateari irekitako baliabidea dela: ikastetxeei, irakasleei, eta baita gurasoei ere. Dena den, euskarri digitalean dagoen hainbat material didaktiko, baldin eta erabilera askekoak badira, plataforma honen bidez eskura ditzake edozein herritarrek, bertan bilaketa egin ondoren.

Temas

Euskera