https://static.elcorreo.com/www/menu/img/zurekin-desktop.jpg

Udalbiltzak eta Koop57k lankidetza hitzarmena sinatu dute

Udalbiltzak eta Koop57k lankidetza hitzarmena sinatu dute
Udalbiltza

Egitasmoak euskal lurraldeak pairatzen dituen desorekak arintzea du helburu

UNAI SARRIUGARTE

Udalbiltzak eta Koop57k lankidetza hitzarmena sinatu dute, euskal lurraldeak pairatzen dituen desorekak arintzeko xedearekin. Hori dela bide, tokiko garapenarekin zerikusia duten ekinbideak sustatuko dituzte, bertako herritarren aukerak errazteko helburuarekin.

Irabazi asmorik gabeko kooperatibek finantza etiko eta solidarioen bitartez Euskal Herriak bizi dituen lurralde desorekin amaitu nahi dute. Hitzarmenaren onespen ekitaldian Luis Intxauspe Udalbiltzako lehendakariak eta Gorka Julio Koop57ko ordezkariak hartu zuten parte. Egitasmo honek lau urteko iraupena izango du.

Koop57 zerbitzu finantzario etikoak eta solidarioak eskaintzen dituen kooperatiba da. Bere helburu nagusia ekonomia eta gizartea eraldatzea da. Hau da, bitartekaritza finantzarioaren bidez ekonomia sozial eta eraldatzailea oinarri duten proiektuak finantzatzea da bere funtzioa. Gizarte zibilaren aurrezkia biltzen du eta ekonomia sozial eta eraldatzailean diharduten erakundeetara bideratzen du.

Bestalde, Udalbiltza izaera juridiko-publikoa duen euskal erakunde nazionala da. Partzuergoa da, eta finkatutako prozedurak betez, hala erabakitzen duten udalek eta lukro asmorik gabeko elkarte pribatuek osa dezakete partzuergo hau.

Euskal Herria burujabe bat eraikitzeko bidean, Udalbiltza Partzuergoak Euskal Herriko garapen eta barne kohesioa sustatzea ditu helburu nagusiak. Horretarako, euskal lurraldea zatitzen duten hiru eremu administratiboetako udalen arteko elkar ezagutza eta lankidetza instituzionala bultzatzen du.

Temas

Euskera