https://static.elcorreo.com/www/menu/img/zurekin-desktop.jpg

Udaberria Euskadira iritsi da

Udaberria irudikatzen duen argazkia./Fotolia
Udaberria irudikatzen duen argazkia. / Fotolia

Hirugarren urtez jarraian atzo eman genion ongietorria loreen urtaroari

UNAI SARRIUGARTE

Udaberria atzo, 22:58an, sartu zen Euskal Autonomia Erkidegoan. Hirugarren urtez jarraian eman diogu hasiera martxoaren 20an loreen urtaroari. Jende askoren ustetan, gaur martxoaren 21ean heltzen da udaberria. Dena dela, usteak erdi ustel, udaberria martxoaren 19a eta 21a bitartean heltzen baita. Zehatzago esanda, urtaroa lehenago edo beranduago heltzea eguzkiaren mende dago; izan ere, lurrak eguzkiaren inguruan egiten duen bideak markatzen du urtaroak noiz iritsi.

Aurrerantzean, beraz, egunak luzeagoak izango dira. Dena dela, udaberrian, gauen eta egunen iraupena oso antzekoa da. Urtaro honek 92 egun eta 18 ordu izango ditu; ekainaren 21eko 17:54ak arte iraungo du. Izan ere, egun horretan udaburua gertatuko da, udari hasiera ematen dion unea.

Udaberrian eguzkia goizetan lehenago ateratzen da, eta, gauetan, berriz, azkarrago ezkutatu. Argi orduek egunean hiru minutu gehiago iraungo dute. Nolanahi ere, martxoaren 31n, udako ordutegira pasatuko gara. Hori dela eta, geure erlojuak ordubete aurreratu beharko ditugu. Hortaz, goizaldeko ordu bietan ordu bata izango da.

Adituek diotenez, orduaren aldaketaren ohitura honek ez du luze iraungo. Hori dela medio, Europar Batasuneko estatuek 2020ko apirila arte daukate udako edo neguko ordutegiarekin geratuko diren edo ez erabakitzeko, Europako Komisioak ordutegi aldaketak bertan behera uztea erabaki baitu.

Azkenengo ordu aldaketa 2021eko martxoan izango da. Erlojuak, azkenengoz, urte horretako urrian aldatuko dira. Europar Batasuna osotzen duten 28 herrialdeak ekainean bilduko dira gai honen inguruan eztabaidatzeko.

Temas

Euskera