https://static.elcorreo.com/www/menu/img/zurekin-desktop.jpg

Taldea desegin aurretik, bira egingo du Ze Esatek!-ek

Ze esatek!-en kontzertu bat./
Ze esatek!-en kontzertu bat.

Sare sozialak baliatu dituzte musika utziko dutela jakinarazteko. Donostiako taldeak hamar urte beteko ditu aurten

AMALIA IBARGUTXI

Hamar urte beteko dituzten honetan, Ze Esatek! musika talde donostiarrak desegin egingo dela jakinarazi du. 2009an sortu zuten, eta 2019ko bira izango dute azkena. Taldeak sare sozialak baliatu ditu musika utziko dutela jakinarazteko, deta zabaldutako adierazpenean, taldearen ibilbidearen errepasoa egiteaz gain, izan dute aukera, baita ere, taldearen joan etorri ezberdinetan parte hartutako lagunei «besarkada handi bana» bidaltzekoa. Pozik daude egin duten bidearekin, eta agur-mezua ere halakoa egin dute.

Mikel Albisu, Jabier Rodil, Iñaki Rodriguez, Julen Valderrama, Unai Arzelus, Antton Albizu, Manex Berzosa eta Jokin Guilisagastik osatzen dute taldea gaur egun. «Ondo pasatzeko intentzioarekin» sortu zuten talde «ganberroa», hedabideek hala izendatutakoa bere garaian. Azaldu dute nola, hasieran, ez zuten bide hain luzea egiterik espero. «Ondo pasatzeko intentzioa» besterik ez zuten, «eta batzuen zoritxarrerako», hamarkada bateko jarraipena izan du proiektuak.

Festa giroko kantuak sortzen dituzte, eta horrek euskal herrietako jaiak alaitzera eraman ditu. 'Maite zaitut Miren Azkarate' izenburuko kantuak eman zituen ezagutzera, eta geroztik, estudioko diskoak eta zuzeneko bat kaleratu ditu ska-rock taldeak.

Plazaratutako lehenengo diskoak 'Ze Esatek!' zuen izena, eta 2010ean kaleratu zuten, Baga-Biga etxeak ekoiztuta; gero sortu zuten 'Rock & Ron' (2011, Oihuka); 'Gu gara' (2012, Oihuka); 'Ibuprofeno' (2013, Mirentxu Records); 'Inoiz egin dugun diskorik onena' (2015, Bonberenea Ekintzak); 'Ibilita ikasten da erortzen' (2017, Baga-Biga); eta, azkenik, 'Aspalditik gatoz, urrutira goaz (askoren artean)', (2017, Bonberenea Ekintzak).

Agur horretan, eskerrak eman dizkiete jarraitzaileei eta beraiekin lan egindako lagunei. «Gurekin dantza batzuk botatzera gonbidatuta zaudete denak 10 urte hauek ospatzeko! Adi azken birako datei! Eta bukatzean... ¡Que os den por culo a todos que esto se acabó!», agurtu dituzte zaleak.