https://static.elcorreo.com/www/menu/img/zurekin-desktop.jpg

Surf Business Meetingen 4. edizioa jada martxan da

Sopelako hondartzak urriaren11an Surf Business Meetingen 4. edizioa hartuko du./JAVIER LÓPEZ FABIÁN
Sopelako hondartzak urriaren11an Surf Business Meetingen 4. edizioa hartuko du. / JAVIER LÓPEZ FABIÁN

Ekimen honek tokian tokiko profesionalak inspiratzea eta laguntzea du helburu

UNAI SARRIUGARTE

Surf Business Meetingen 4. edizioa jada martxan da. Aurtengo edizioa datorren urriaren 10ean eta 11an Getxon eta Sopelan ospatuko dute. Bertan eskualdeko surf eskolek tailer eta workshop ezberdinak eskainiko dituzte, bisitarien gozagarri izan daitezen. Sopela eta Getxoko 8 surf eskolekin batera, Cisco Araña egongo da, Brasilgo lehendabiziko surflari profesionala izandakoa.

Surf Business Meetinga urtero ospatzen den jardunbide egokien eta hartu-emanean oinarritzen den ekitaldia da, hitzaldi eta surf industrian erreferente diren pertsonen artean. Ekimen honek tokian tokiko profesionalak inspiratzea eta laguntzea du helburu, interesgarriak izan daitezkeen gaietan, batez ere, surf industriari loturiko ekintza profesionalen garapenean.

Topagune hau, surf sektoreko ekintzaileentzako aukera paregabea da, haien ezagutza zabaltzeko, eta haien egitasmoak garatzeko, intereseko harremanak ezartzen dituztelarik. Era berean, ezagutzaren hartu-eman bat bilatzen da, hala nola, surf eremuko agenteak biltzea, industriaren balore-kate osoa barneratuz: ekoizleak, hornitzaileak, banatzaileak, hezitzaileak etab.

Egitasmo honen jarduera garrantzitsuena Sopela eta Getxoko surf eskola ezberdinetako monitorei bideratutako ikastaroa izango da. Hauxe gaur bertan ospatuko da arratsaldeko bostetatik aurrera Sopelako Arrietara hondartzan.

Urriaren 11n, berriz, Cisco Arañak doako hitzaldi bat eskainiko du Surf Business Meeting ekimenaren barruan. Mintzaldiak surf profesionlaren nondik-norakoak izango ditu hizpide. Bertan parte-hartu nahi izanez gero honako helbide honetan izen ematea ezinbestekoa da: http://surfbusinessmeeting.pro/eu/home.

Cisco Araña, Brasilgo lehenengo surflari profesionala, egun bere herrialdeko lehendabiziko surf eskolako zuzendaria da. Araña bi hamarkada inguru daramatza lanean, bizitzan zailtasunak jazaten dituzten kolektibo ezberdinei laguntzen: gizarte-bazterketa arriskua, mugikortasun arazoak eta ezintasunak (adimenekoak, psikikoak, fisikoak, autismoaren espektroaren nahasteak etab.

Gainera, Ciskoren taldeak San Pauloko Unibertsitateko irakasleekin batera martxan jarritako metodologia berezi batek kolektibo hauetako personentzako surf egiteko teknikak jorratzen eta ikerketak burutzen dabiltza.

Temas

Sopela